Törek matbuğatına küzätü 11.08.2020

“Xörriyät” gazetı yazğança Törkiyä ilbaşı Räcäp Tayyip Ärdoğan Könçığış Urta diñgez belän bäyle Greŝiya häm Misır arasında tözelgän kileşüneñ xoquqıy nigezeneñ bulmawın belderde.

Xäbärdä ilbaşınıñ tübändäge süzläre urın ala: “Äydägez, Urta diñgez illäre bularaq barıbız bergä yaña formula tabıyq. İlebezeñ bu çaqıruına bitaraf qaluçılar köçläre citmäyäçäk ber törkem kereşülär belän üz kiläçäklären beterä.”

“Sabah” basması beldergänçä Tışqı êşlär ministrlığı süzçese Xami Aksoy Urta diñgezdä kiyerenkelekne arttıruçı tarafnıñ Törkiyä tügel, ä Greŝiya buluın citkerde.

Xäbärdä Aksoynıñ süzlärenä urın birelä: “Ğasırlar buyı Törkiyä xaqimiyäte astında bulğan Urta diñgezdän ilebezne çitläşterä almaslar. “Urta diñgez mineke genä” dip uylawçılar bik yalğışa.”

“Xäbär türk” gazetı citkergänçä Törkiyä Urta diñgezdä yaña NAVTEX (xalıqara avtomatlaştırılğan xäbär birü sisteması) iğlan itte.

Xäbärdän kürengänçä “Oruç Reis”, “Ataman” häm “Çıñğız Xan” köymäläre öçen iğlan itelgän NAVTEX 23 avgustka qadär däwam itäçäk. Köymälär Könçığış Urta diñgezdä Kipr sulıqlarında monnan alda iğlan itelgän töbäktä seysmik êşçänleklär alıp baraçaq.

“Star” basması Törkiyä belän Azärbaycan urtaq räweştä oyıştırğan xärbi künegülärneñ bar dön’yada kiñ yañğıraş tabuın yaza.

Gazet yazğança älege künegülär töbäktä 1990nçı yıllar başında bulğanı kebek xalıqara xoquqqa qarşı kereşülärgä röxsätneñ birelmäyäçägen, illärneñ cir bötenlege belän ber rättän xalıqara xoquqnıñ töp nigezläreneñ saqlanaçağın, tınıçlıq häm totrıqlılıqnıñ garantiyase buluın kürsätte.

“Watan” gazetı xäbärenä kürä Törkiyäneñ berençe vakŝinası äzer.

Xäbärdä Törkiyädä koronavirusqa qarşı vakŝina tabu êşçänlegen alıp barğan törkem başındağı Prof. Dr. Xakan Akbulutnıñ süzläre urın ala: “8 iyul’dä başlanğan xayvannar östendäge êşçänleklärebez uñışqa ireşte. Oktäbr’ ayında berençe vakŝinanı citeşterergä planlıybız.”