Törek matbuğatına küzätü 07.08.2020

“Yäni Şafak” gazetı Törkiyä tışqı êşlär ministrı Mäwlüt Çavuşoğlunıñ kiçä Liviya säfäre waqıtında yasağan açıqlawına urın birä: “Mäydan tınıçlandı disäk tä, Liviya probleması çişelmäde. Bez çişeleş tabar öçen östäl artına utırdıq, läkin torıp kitüçe Xafter ide. Xafter säyäsi çişeleşkä ışana, qabat höcüm itä ala.”

“Sabah” basması beldergänçä Törkiyäneñ Sälamätlek saqlaw ministrı Faxrettin Koca soŝial’ media xisabında SKY NEWSnıñ Törkiyäneñ Kovid-19 kizüenä qarşı köräşen maqtawçı video yazma urnaştırdı.

Xäbärgä kürä videoda törek mediśina xezmätkärläreneñ kizü belän köräştä bik küp tırışlıq quyuı, çirne küzätüdä detektiv kebek êşläwe urın ala.

“Xäbär türk” gazetı citkergänçä Törkiyädä avtomobil’ industriyaseneñ iyul’ ayındağı êksportı iyun’ ayı belän çağıştırğanda 9,2%ka arttı.

Xäbärdän kürengänçä iyun’dä 2 milliard 16 million dollarlık êskport iyul’dä 2 milliard 201 million dollarğa citte.

“Watan” basması xäbärenä kürä İstanbuldağı mobil’ uyın şirkäte Rollik Geyms 168 million dollarğa Amerikan şirkäte Zinga’ğa satıldı.

Gazet yazğança Zinga iyun’ ayında da törek uyın şirkäte Pik Geymsnı 1,8 milliard dollarğa satıp alğan ide.

“Star” gazetı beldergänçä Prem’yer Ligada Lester Siti taqımında uynawçı törek futbolçısı Çağlar Söyüncü Barselona komandasıa küçä.

Xäbärgä kürä Barselona belän prinŝiplı kileşü tözegän Çağlar Lester Siti belän Barselona arasında kileşüneñ täêmin itelüen kötä.