Törek matbuğatına küzätü 6.01.2020
6nçı ğıynvar könne çıqqan qayber törek gazetlarına küzätü
“Xörriyät” gazetı yazğança, “AQŞ belän İrannı ayıq aqıllı bulırğa çaqırdılar”.
Törkiyä ilbaşı Räcäp Tayyip Ärdoğan AQŞnıñ iranlı general Qasıym Söläymaninı üterüennän soñ barlıqqa kilgän kiyerenkelekne kimetü kiräklegen belderep, ayıq aqıllı bulırğa çaqırdı. “Barlıq yaqlar zarar küräçäk noqtağa kilgänçe bu kiyerenkelekneñ kontrol’ astına alınuı kiräk,”-dide ul.
“Sabax” gazetı “Çavuşoğlu katarlı wazıyfadaşı belän söyläşte” dip xäbär itä.
Törkiyä tışqı êşlär ministrı Mäwlet Çavuşoğlu Katar tışqı êşlär ministrı şäyex Möxämmäd bin Abdurraxman Al Sani belän telefon aşa söyläşte. Diplomatik çığanaqlardan alınğan mäğ’lümatlarğa qarağanda, ike ministrnıñ äñgämäse general Qasıym Söläymaninıñ üterelüe turında ide.
“Watan” gazetı Liviyädäge qanlı waqıyğanı ğayepläp yaza.
Törkiyä Liviyäneñ başqalası Tripolida Xafter köçläreneñ xärbi uqu yortına höcümen ğayepläde. Tışqı êşlär ministrlığınnan yasalğan belderüdä ğomere özelüçelärgä Allahtan yarlıqaw, yaralanuçılarğa şifalar telädelär.
“Star” gazetı “Süriyädän qaçqan 2 terrorçı üzläre birelde” dip citkerä.
Süriyädäge sıyınu mäydannarınnan qaçqan PKK/YPGlı 2 terrorçı Şanlıurfa Suruçtağı çik buyı berleklärenä birelde. Milli saqlanu ministrlığı tarafınnan kiçä yasalğan belderüdä terrorçı oyışmadan qaçularnıñ däwam itüe äytelä.
“Yaña Şäfaq” gazetı “Ädirnägä ağıluçı bolğar häm grek turistlar 270 million yevro qaldırıp kitte” dip yaza.
Ädirnägä uzğan yıl Bolgariyä häm Greśiyädän alış-bireş yasaw öçen 2 million 736 meñnän artıq turist kilde. Alar kibetlär häm restorannarda 270 million yevro aqça tuzdırıp il iq’tisadına öleş kertte. Ädirnä kiläse yıl 5 million grek häm bolgarnı qunaq itärgä isäpli.
