Törek matbuğatına küzätü 30.09.2019

”Xäbär Törek” gazetı “İlbaşı Ärdoğan yaqında üz xärbi oçqıçıbızğa qawışaçaqbız dip belderde” isemle yazmasında Törkiyä ilbaşı Räcäp Tayyip Ärdoğannıñ F-35 xärbi oçqıçları mäs’äläsendä Amerika Quşma Ştatları belän küzätelgän problemalarğa tuqtalıp Törkiyäneñ cirle citeşterügä östenlek birüenä basım yasawı turında yaza. Ärdoğan “Atak” boralağın, qorallı häm qoralsız keşesez hawa transportların niçek êşläp çığarğan bulsaq, iyärçennärebezne niçek oçırtqan bulsaq ,yaqında üz xärbi oçqıçıbıznı da êşläp çığaraçaqbız”dip belderde. 

 “Sabah” gazetı “Törkiyäneñ yaña milli xärbi köymäse TCG Kınalıada” isemle xäbärendä Törkiyäneñ yaña milli xärbi köymäse “TCG Kınalıada”nıñ ilbaşı Räcäp Tayyip Ärdoğan da qatnaşqan tantanada Diñgez Köçlärenä tapşırıluın xäbär itä.  

”Star” gazetınıñ  “Törkiyä sälamätlek saqlaw ölkäsendä ürnäk il” isemle yazmasınnan kürengänçä, Bötendönya sälamätlek saqlaw oyışmasınıñ qaçaqlarnıñ sälamätlege belän bäyle dönya kürgän xisabında Törkiyä maqtaw süzläre belän telgä alına. 13 meñnän kübräk dokumentnı tikşerep äzerlängän xisapta Törkiyäneñ 4 million sıyınuçığa tigez şartlarda sıyfatlı xezmät birüe assızıqlana. Awrupada isä ayırıp qarawğa duçar bulğan qaçaqlarğa mediśina xezmätläre citärlek däräcädä kürsätelmi.

“Xörriyät” gazetı “Boğaziçi sammitına 90 ildän 3 meñ qatnaşuçı” isemle xäbärendä bıyıl ilbaşı ximayälärendä 26-28 nçe noyabr könnärendä 10 nçısı uzaçaq Boğaziçi sammitında rekord däräcädä qatnaşu kötelüen uquçıları belän urtaqlaşa. Sammitnı oyıştıruçı Xalıqara xezmättäşlek platformasın qoruçı Cängiz Özgencil Törkiyägä qarata zur qızıqsınu kürsätelüen ,ğıynwar ayınnan birle 20 dän kübräk ildä oçraşular ütkärülären häm Törkiyägä qarata iğ’barnıñ artuın kürülären citkerä.

”Star” gazetı “Awrupalı turist İstanbulda” isemle xäbärendä Awrupalı häm Yaponiya turistlarınıñ İstanbulğa yünälüennän soñ avgust ayında İstanbulda qunaqxanälärneñ  90% külämendä tuluın citkerä. Soñğı aylarda ayıruça Yaponiya, Qıtay häm Hindıstannan kilgän turist sanında artış küzätelä.

”Yaña Şafak” gazetı ”Törkiyäneñ 2023 nçe yıl turizm strategiyäse” isemle xäbärendä turizm tarmağı wäkilläreneñ Törkiyäneñ 2023 nçe yılğı 75 million turist maqsatına yünälüen citkerä. Urta diñgez turistik qunaqxanälär berlege başlığı Êrkan Yağcı “2023 nçe yılda 75 million turist maqsatına ireşü - Törkiyä öçen mömkin bulğan maqsat. Bezneñ dä bu yünäleştä êşçänleklärebez däwam itä”dide.