Törek matbuğatına küzätü 26.07.2019

“Xäbär türk” gazetı “Komandirlar Süriyägä operaśiyä turında söyläşte” dip yaza

Törkiyä milli saqlanu ministrı Xulusi Akar AQŞtan kilüçe delegaśiyä belän oçraşudan soñ belderü yasadı. Ul Süriyädä imin töbäk mäs’äläsendä barlıq fikerlär, täq’dimnarne xezmättäşlärenä citkerülären äytte. “Bolarnı centekläp tikşerep cäwaplarnı tiz arada birülären kötäbez. Soñarularğa sabırlığıbız qalmawın, kiräk bulsa iniśiativabıznı qullanaçağıbıznı üzlärenä tağın ber qat citkerdek,”-dide ul.  

“Watan” gazetı yazğança, “Törkiyä hawadan saqlanunı köçäytä”

Törkiyä milli saqlanu ministrlığı Rusiyädän alınğan S-400 hawa saqlanu sistemalarınıñ berençe törkem cihazların kiterüneñ kiçä tämamlanuın açıqladı. Sistemanı qoru başlanğan häm däwam itä. İkençe törkem yöklärne dä Änkarağa kiteräçäklär. Wäqalätle zatlar Franśiyä täq’dim itkän ber danä SAMP-T batareyası quyılaçaq töbäkneñ isä Törkiyäneñ kön’yaq çikläre bulaçağın belderde.

“Star” gazetı F-35 proyektında Törkiyäneñ rölen iskä töşerä

Törkiyä saqlanu sänäğate şirkätläre Urtaq höcüm oçqıçları F-35 proyektında iñ köndäşçel bäyälär belän üzqıymmätne kimetä. Oçqıçnıñ bik küp öleşläre törek firmaları tarafınnan citeşterelä. Törkiyäneñ proyekttan çığuı oçqıçnıñ bäyäsen 7-8 million dollardan 10 million dollarğa qadär arttıraçaq.

“Yaña Şäfaq” gazetında “Awrupa Berlege süzendä tormadı, Törkiyä kileşüne tuqtata” digän mäqalä basıldı

2014nçe yılnıñ 1nçe oktyabrendä ğamälgä kergän häm qanunsız yullar belän Törkiyä aşa Awrupa Berlege illärenä kitkän migrantlarnı kire Törkiyägä qaytaru turındağı kileşü tuqtatılıp tora. Säbäbe - Awrupa Berlegeneñ birgäñ süzendä tormawı. Kileşüneñ tuqtatıluı turında tışqı êşlär ministrı Mäwlet Çavuşoğlu xäbär itte. “Kire qabul itü añlaşuı Törkiyä watandaşlarına viza irege belän bergä ğamälgä keräçäk,”-dide ul.

“Xörriyät” gazetı Rusiyäneñ xosusıy häm xezmät passportı öçen vizanı beterüen yaza

Rusiyä däwlät başlığı Vladimir Putin xosusıy häm xezmät passportı bulğan törek watandaşlarına viza irege kertü turında kürsätmä birde.