Törek matbuğatına küzätü 29.04.2019

“Yaña Şäfaq” gazetı yazğança, “Turizmda 35 milliard dollardan artıq valyuta kerüe kötelä”

Törkiyä säyäxät agentlıqları berlege räise Firuz Bağlıkaya: “Maqsatıbız 50 million turist kürsätkeçenä, inşallax, ireşäçäkbez. Tarmaqta 35 milliard dollardan artıq valyuta kerüe kötelä,”-dide. Ul sektornıñ 2018nçe yılnı rekord belän yabuın häm 2019nçı yılnı da şul uq tizlek belän başlawların, 2 ayda 7,4% artu buluın söyläde. Bağlıkaya äytkänçä, Törkiyädä “diñgez, qom häm qoyaş” turizmı yılda maksimum 6-7 ayğa citä, sälamätlek häm mädäniyät turizmı şikelle mäydannarda bu 10-12 ay.

“Xörriyät” gazetı “Ukrainalı turist sanında zur artu” dip yaza

Ukrainanıñ İstanbul konsulı Oleksandr Gaman watanınnan Törkiyägä kilüçe turist sanında daimi artu buluın belderde. “İstanbul ukrainalı turistlar öçen torğan sayın tağın da ähämiyätle adres xälenä kilä,”-dide ul häm bıyıl säfär qıluçılarnıñ tağın da kübäyäçägen assızıqladı.  

“Star” gazetı “Törkiyäneñ Ğıyraq watandaşları öçen kertkän vizası daimi tügel” dip yaza.

Tışqı êşlär ministrı Mäwlet Çavuşoğlu Törkiyä belän Ğıyraq arasındağı viza sistemasınıñ waqıtlıça buluın belderde. Ul älege ildä êşlär rätkä kergännän soñ vizalarnıñ betereläçägen söyläde.

“Watan” gazetı “Dön’yada işe yuq, bäyäläp betergesez” dip yaza

Tokatta ber kollekśionernıñ siräk äsärläre arasında urın alğan altın yözekneñ zöbärcät taşında İskändär Makdunineñ portretı yasalğan. Anıñ êllenistik çorğa qarawı farazlana. Taş östendäge motivnıñ niçek êşlänüe sorawına cawap äle xaman tabılmıy. Belgeçlär metalı 21,5 karat altın, taşı tabiğıy zöbärcät bulğan äsärneñ bügenge texnologiyälär belän dä yasala almawın söyli. Şuna kürä anıñ 2 meñ yıl êlek niçek êşlänüe ser bulıp qala.  

“Xäbär türk” gazetı “Mizgel êçendä xäbärläşü öçen cirle programma” turında yaza

Törkiyäneñ telekommunikaśiyälär operatorı Türk Telekom mizgel êçendä xäbärläşü programması xäzerläde. Ul LAFF dip atala. Programmanıñ Beta versiyäse Android häm iOS platformaları öçen qullanılışqa täq’dim itelde. LAFF Beta barlıq mobil’ platformalar arqılı operatordan bäysez räweştä qullanıla.