Törek matbuğatına küzätü 24.04.2019

“Yaña Şäfaq’” gazetı “AQŞnıñ sankśiyälärenä bez qarşı” digän xäbär belän urtaqlaşa

Törkiyä tışqı êşlär ministrı Mäwlet Çavuşoğlu belderü yasap, AQŞnıñ İran neft’ sankśiyälärennän irekle totılğan 8 däwlätkä qabat bu xoquqnı birmäw qararına qarşı buluların söyläde. Ul Awrupa Berlegeneñ dä qarşı buluın äytte. “Bu küp kenä däwlätkä täêsir itäçäk,”-dide ministr.  

“Sabax” gazetı “Törkiyä Qorallı köçläre Ğıyraqnıñ tön’yağına hawa xäräkäte yasadı” dip yaza

Ğıyraqnıñ tön’yağındağı Xakurk töbägenä bulğan hawa xäräkätendä separatist terrorçı oyışması PKKlılarnıñ qoral saqlağıçı, sıyınu urınnarı häm kiräk-yaraq kelätläre bularaq qullanıluçı ob’yektları yuqqa çığarıldı.

“Star” gazetı “İlbaşı rezidenśiyäsendä 23nçe aprel’ tantanası” turında mäqalä urnaştıra

İlbaşı Räcäp Tayyip Ärdoğan kiçä rezidenśiyäsendä milli mäğarif ministrı Ziya Sälçukne häm anıñ belän bergä kilüçe delegaśiyäne qabul itte.  Ärdoğan balalarğa möräcäğat’ itep bolay dide: “Bäysezlek yalqını millätebezgä härwaqıt yaqtılıq birep tordı. Xıyallarığıznıñ qarşına bernindi kirtä quymağız”. İlbaşı 23nçe aprel’ bäyräme uñayınnan känäfiyen 12 yäş’lek Ozanğa tapşırdı.

“Xäbär Türk” gazetı yazğança, “Törkiyädän Angliyä häm Germaniyä törmälärenä iminlek”

Törek şirkätläre çığara torğan iminlek cihazları çit illärdä populyarlaşa. “’Elektral” firmasınıñ işek detektorları Angliyä, Germaniyä törmälärendä, törle aêroportlarda, mäxkämä binası häm tarixi cirleklärdä iminlekne saqlawda rol’ uynıy.   

“Watan” gazetı xäbär itkänçä, “Törkiyä hawa yulları Änkara-Baqı oçışların başladı”

Törek hawa yullarınıñ Änkara belän Baqı arasında turıdan oçışları başlandı. Täwge säfär uñayınnan Xäydär Aliyev aêroportında tantanalı çara uzdı. Anda räsmi zatlar häm turizm agentlıqlarınıñ wäkilläre qatnaştı.