Törek matbuğatına küzätü 2.04.2019

“Xörriyät” gazetı “Ministr Çavuşoğlunıñ Venesuêla belderüe” turında yaza

Törkiyä tışqı êşlär ministrı Mäwlüt Çavuşoğlu Törkiyäneñ Venesuêlağa teläktäşlek kürsätüne däwam itäçägen belderde. Ul Änkarağa räsmi säfär belän kilgän venesuêlalı wazıyfadaşı Xorxe Arreaza belän urtaq matbuğat cıyılışı ütkärde.

“Sabah” gazetı “Ğıyraqnıñ tön’yağına hawa xäräkäte” xaqında mäğ’lümat birä

Milli saqlanu ministrlığı kiçä Ğıyraqnıñ tön’yağına oyıştırılğan hawa xäräkätendä separatist terrorçı oyışma PKKnıñ maqsatların yuqqa çığardı. Twitter xisabınnan yasalğan belderüdä äytelgänçä, xäräkät Avaşin-Basyan häm Xakurk töbäklärenä yasalğan. Anda terrorçılarnıñ sıyınu urınnarı, kelätläre, qoral saqlağıçları bombalana.    

“Xäbär Türk” gazetı yazğança, “Atak Braziliyäne sixerläde”

Atak boralağı Braziliyädä tormışqa aşırılğan şow qısalarında yaqınça 18 säğat’ kürsätmä oçışlar yasadı. Bu waqıt içendä şturvalğa 11 oçuçı çiratlaşıp utırdı. Boralaq Rio de Janeyro şähäreneñ simvolı bulğan Ğaysä häykälen dä äylänep çıqtı.  

“Yaña Şäfaq” gazetı “Törek saqlanu sänäğate LAAD kürgäzmäsenä äzer” dip yaza

Törkiyä 2nçe-5nçe aprel’dä Braziliyädä uzaçaq LAAD saqlanu häm qurqınıçsızlıq kürgäzmäsenä 17 şirkät belän baraçaq. Anda ildä citeşterelgän köbäle texnika platformaları, keşesez hawa häm cir apparatları törläre, diñgez sistemaları, qoral caylanmaları, êlektron êşlänmälär, simulyatorlar, xärbi tuqımalar häm başqalar kürsäteläçäk.  

“Star” gazetı “Törkiyä hawa yullarınıñ London-Antaliyä säfärläre başlandı” dip xäbär itä

Bu xaqta şirkät üze belderde. Berençe oçış yäkşämbe könne buldı. Anda lotereya da uynatıldı. İke yulçı London-Antaliyä säfärenä baru häm qaytu biletların ottı.