Törek matbuğatına küzätü 26.03.2019
26nçı martta çıqqan qayber törek gazetlarına küzätü
“Xäbär Türk” yazğança, “Törkiyä saylawlardan soñ tağın da kübräk investiśiyä cälep itäçäk”
İlbaşı strategiyäse häm byudjet ministrı Naci Ağbal 31nçe martta uzaçaq saylawlardan soñ 4 yıl yarım saylawlar bulmayacağın häm bu çorda il tağın da köçle adımnar yasayaçağın belderde. Anıñ äytüençä, Törkiyä iq’tisadı bulırğa tiyeşle noqtağa baraçaq.
“Törkiyä iq’tisadı köçle däwlät finansı, bankacılığı, yäş’ xalqı, êlemtä häm transport asqorması, urnaşu urını östenlekläre belän kiläçe çorda tağın da kübräk investiśiyä cälep itäçäk,”-dide ministr.
“Star” gazetında “Rusiyä belän passportsız çor” digän yazma urnaşqan
Törkiyä tışqı êşlär ministrı Mäwlet Çavuşoğlu rusiyälelärneñ çit il passportınnan başqa kerüe öçen êşçänlek başlanuın belderde. “28nçe martta Rusiyä tışqı êşlär ministrı Sergey Lavrov Antaliyägä kiläçäk häm anda bolarnı centekle räweştä söyläşäçäkbez. 8nçe aprel’dä bez Mäskäwgä barabız,”-dide ul. Çavuşoğlu äytüençä, Törkiyägä qışın sälamätlegen nığıtu häm başqa maqsatlar belän kilüçe turistlar tağın da ozağraq waqıtqa qalırğa teli. Ul 90 könlek qalu waqıtın ozınaytaçaqların da äytte.
“Yaña Şäfaq” gazetı “Balkan illärennän Ädirnägä turist ağımı” turında yaza
Ädirnä - Törkiyä şähärläre arasında turist sanı buyınça İstanbul häm Antaliyädän genä qalışa. Uzğan yıl ul 3 million turistnı qabul itep 3nçe urınğa çıqtı. Şähärgä Greśiyä häm Bolgariyädän küp kilälär. Sonğı waqıtta Makedoniyä, Rumıniyä, Xorvatiyä häm Serbiyädän dä qunaqlar yışayğan. Atna axırında turistlar barlıq qunaqxanälär häm pansionnarnı tutırdı.
“Xörriyät” gazetı yazğança, “Şanlıurfanıñ yar buyı şähäre Xalfäti qunaqlar kötä”
Şanlıurfanıñ Xalfäti rayonına yaz belän bergä turistlar da kilde. Tınıç häm xozurlı buluı öçen 2013nçe yılda ul xalıqara koordinaśiyä oyışması tarafınnan “Tınıç şähär” çeltärenä kertelde. Monnan tış, tarixi taş öyläre häm tabiğıy maturlıqları belän cirlek kön’yaq-könçığışnıñ “yäşeren cännäte” bularaq ta yörtelä. Rayon uzğan yıl 600 meñ tiräse turistnı qunaq itte.
“Watan” gazetı xäbär itkänçä, “Cirle avtomobil’ citeşterü êlektriklı SUV belän başlana”
Törkiyäneñ cirle avtomobile belän bäyle detal’lär bilgele bula başladı. Texnikanıñ proyektlaw êtabı axırına yaqınlaşa. 2022nçe yılda satuğa çığarılaçaq cirle maşina 100% êlektrlı bulaçaq. Anı yasayaçaq aqıllı êşxanäne tözü isä bıyıl başlana. Anda yaqınça 20 meñ keşeneñ êşläwe kötelä.
