Törek matbuğatına küzätü 13.03.2019

“Star” gazetı yazğança, “London belän Pekinnı ber-berse belän bäylädek”

Törkiyäneñ in zur transport êlemtäse investiśiyälärennän berse bulğan Gäbzä - Xalkalı şähär yanı timer yulı açıldı. İlbaşı Räcäp Tayyip Ärdoğan beldergänçä, bu yul Bosfor buğazınnan Marmaray belän kiçä. Londonnan quzğalğan poyezd monnan Pekinğa qadär kitäçäk. “İke qıytğanı rel’slı sistema belän ber-bersenä bäylädek,”-dide ilbaşı.

“Xörriyät” gazetı “Törkiyä kereme yuğarı Rusiyä turistları öçen tağın da ımsındırğıç bulaçaq” dip yaza

Keremnäre yuğarı bulğan turistlarnı Awrupa urınına Törkiyäne saylarğa êtärü öçen êşçänlek tizläneş aldı. Monıñ qısalarında Törkiyädäge bik küp çaralarda Rusiyä maqtawlı qunaq bularaq qatnaşaçaq. Rusiyädän İstanbulğa yasaluçı östämä räweştä kertelgän tariflı oçqıç säfärlärendä dä biznes klass barlıqqa kiläçäk. Turizm buyınça hönäri liśeylarda rus tele mäcbüri fännär rätenä kertelde.  

“Watan” gazetı beldergänçä, “TANAPtan kilüçe gaz 4 milliard kubometrğa citä”

Azärbaycannıñ tabiğıy gazın Törkiyä arqılı Awrupağa iltüçe Trans Anadolu gazütkärgeçe (TANAP) aşa 2018nçe yılnıñ 30nçı iyüne belän 2019nçı yılnıñ 28nçe fevrale arasında Törkiyägä tulayım 1 milliard 250 million kubometr yağulıq cibärelde. 2019nçı yılnıñ axırına qadär ütkärgeç aşa 4 milliard kobometr gaz cibärelgän bulaçaq. Şunısı qızıq, proyekt tözelgändä yaña biologik törlärgä tap buldılar.  Alarnıñ 9ı xaywan, berse - üsemlek. Monnan tış, 154 arxeologik alan tabıldı.

“Sabax” gazetında “Latinnarnıñ Törkiyä belän qızıqsınuı Törek hawa yulların oçırdı” digän xäbär urın ala

Törkiyägä uzğan yıl Latin Amerikasınnan kilüçelärneñ sanı, 2017nçe yılğa qarağanda, 59%qa arttı häm 252 mengä citte. İñ küp turist Braziliyädän ide. Barlığı 78 meñ 691 keşe. Artu bıyıl da däwam itä. Ayıruça, dini turizm öçen kilälär. Bu Törek hawa yullarınıñ da Latin Amerikası illärennän kiterüçe yulçı sanın arttırdı.

“Xäbär Türk”  gazetı Medipol Başakşähärneñ Awrupadağı uñışı turında yaza

İstanbul komandası, Super Liga häm Awrupanıñ 5 zur ligasın qarağanda, qapqasına urtaça iñ az gol kertterüçe sanala. Medipol Başakşähär 25 matçta 12 alqanı totıp qala almağan. Bu urtaça 0,48 gol dip alına. İstanbul komandasınnan son Liverpul’ kilä. Ul 30 matçta qapqasına 17 alqa kerttergän.