Törek matbuğatına küzätü 28.01.2019
28nçe ğıynvar könne çıqqan qayber törek gazetlarına küzätü
“Xörriyät” gazetı Çavuşoğlu süzläre belän “Artında PKKnıñ buluın beläbez” dip yaza
Tışqı êşlär ministrı Mäwlet Çavuşoğlu şimbä könne Ğıyraqnıñ tön’yağında Törkiyä qorallı köçläre bazasına PKK tarafınnan yasalğan höcüm belän bäyle prośessnı yaqınnan küzätülären belderde. “Ğıyraqta yaña xökümät tözelü belän bergä Tön’yaq Ğıyraq töbäk idaräsen dä kertep PKKğa qarşı êşlänäçäk adımnar bar. Şuna tınıçlıqları yuğaldı. Cirle xalıqnı qotırta başladılar. Monıñ artında PKKnıñ toruın beläbez,”-dide ministr.
“Xäbär Türk” gazetı yazğança, “Törkiyä qorallı köçläre Azäz häm Mare frontında YPGgä bärde”
Azäz häm Maredä qayber cirleklärne basıp alğan YPG/PKKlılar belän Bäysez Süriyä armiyäse arasında bäreleş kilep çıqtı. Anda armiyä saflarındağı ber xärbi hälaq buldı, 3se yaralandı. Şunnan soñ Färat qalqanı töbägendäge Tökiyä qorallı köçläre front sızığındağı YPG/PKK terrorçılarınıñ suğış kiräk-yaraqları saqlağıçına 20dän artıq gaubiśa atışı yasadı. Näticädä bik küp terrorçınıñ täêsirsez xälgä kilüe belderelde.
“Star” gazetı “2 million yarım keşe aldan yal itü urını alıp quydı” dip xäbär itä.
Bıyıl çit ildän kilüçe turist sanında artu kötelä. Tur operatorlar platforması wäkile Cäm Polatoğlu beldergänçä, 50 % taşlama häm 9 ayğa bülep tüläw mömkinlege birüçe kampaniyädän xäzergä qadär 2 million 500 meñ keşe faydalanğan. Ul çit illärdän sorawnıñ şaqtıy buluın äytä. “Berençedän, Rusiyädän bronläşterüçelär bar. Awrupağa kilsäk, Germaniyädän citdi qızıqsınu küräbez. Şunısı söyenderä, Angliyä turistları 3 yıldan soñ qabat Bodrumğa kilä başladı. Başqa Awrupa illärennän dä artu kötäbez,”-dide Polatoğlu.
“Yaña Şäfaq’” gazetı yazğança, “Küper häm avtomobil’ yulları sekund sayın 58 lira kiterde”
Kön sayın urtaça 1 million maşina ütüce küper häm avtomobil’ yullarınnan uzğan yıl här sekund sayın 57,8 lira kerem kilde. Räsmi mäğ’lümatlarğa qarağanda, 2001nçe-2018nçe yıllar arasında küperlärdän 2 milliard 500 million, avtomobil’ yullarınnan isä 3 milliard 400 million maşina ütte. Bu çorda tulayım kerem - 12 milliard 400 million lirağa citte.
“Watan” gazetı “Törek qızı dön’ya rekordı yasadı” dip xäbär itä
Rusiyäneñ Odinśovo şähärendä yäşäwçe törek qızı Osman Dälibaş su êçendä 1 säğat’ 4 minut torıp dön’ya rekordı yasadı. 26 yäş’lek qıznıñ änise rus, ätise - törek. Osman Dälibaş rus xärbilären bozlı suda isän qalırğa öyrätä. Anıñ rekordı Ginnesnıñ räsmi internet säxifäsendä çığa başladı. Barlıq dön’yanı şaqqattırğan Dälibaş videoda törekçä söyläşep Törkiyägä sälam cibärde.
