TÖREK MATBUĞATINA KÜZÄTÜ 13.11.2018

“Watan” gazetı “Ministr Soylu AQŞnıñ PKK atamannarı xaqındağı qararı turında söyläde” dip yaza

Törkiyä belän Amerika PKKnıñ 3 atamanın “qara isemlek”kä östäde. Êçke êşlär ministrı Söläyman Soylu monıñ belän bäyle şaqqattırğıç belderü yasadı. Ul AQŞnıñ separatist terrorçı oyışması PKK mäs’äläsendä ike taraflı uyın uynawın äytte. “Strategik urtağıbız bezneñ belän bergä 3 terrorçını isemlekkä quya, arttan isä, Süriyäneñ Ğıyraq çigendä, PKK belän neft’neñ 25%ı mineke, 75%ı sineke bulaçaq dip büleşä. Bu - ikeyözlelek, bu -yasalmalılıq. AQŞnıñ qayda, qaysı könne, kem belän kileşü yasawın belep torabız,”-dide ministr.

“Star” gazetı yazğança, “Tuplam 38 separatist terrorçı täêsirsez xälgä kiterelde”.

Milli saqlanu ministrlığınıñ Twitter xisabınnan yasalğan belderüdä 10sınnan 12nçe noyabr’gä qadär Ğıyraqnıñ tön’yağındağı Zap, Avaşin-Basyan, Gara, Xakurk häm Xaftanin töbäklärenä hawa xäräkätläre oyıştırıluı äytelä. Näticädä terrorçılarnıñ qoral saqlaw häm sıyınu urınnarı yuq itelgän. Tuplam 38 terrorçı täêsirsez xälgä kiterelgän.

“Sabax” gazetı Törkiyä sänäğat’ ministrınıñ cirle avtomobil’ turındağı belderüenä iğ’tibarnı cälep itä.

Sänäğat’ ministrı Mostafa Varank cirle maşina prototibınıñ 2019nçı yılda çığaçağın äytte. “Törkiyäneñ avtomobil’ proyektı törek sänäğateneñ üzgäreşe häm texnologik üseşendä möhim işek bulaçaq. Maqsatıbız - urtaça häm yuğarı texnologiyälär citeşterü öleşen xalıqara bazarlarğa kertep arttıru,”-dide ul.

“Xörriyät” gazetı yazğança, “Ukrainada sälamätlek turizmında iñ populyar il Törkiyä”

Ukrainalılarnıñ mediśina yärdäme öçen iñ küp kitkän illär arasında Törkiyä berençelekne alıp tora. Alar, ayıruça, yaman şeşne açıqlaw häm däwalaw, ortopediyä xastalıqları öçen kilä. Ukrainalılar yaña şäxes tanıqlığı belän ike il arasında kerep-çığıp yöri ala, 90 kön vizasız yäşäw mömkinlegenä iyä.  

“Yaña Şäfaq” gazetı “Yaponnar törek tawığın oşattı” dip xäbär itä

Bursada citeşterelüçe törek tawıqları yaponnarnıñ küñelenä xuş kilde. Xätta ürçetü urınnarın kürü häm tikşerü öçen älege ildän delegaśiyä kilde. Yaponiyä 2 yıl êçendä 600 meñ tonna tawıq ite alırğa teli. Berençe êtapta 500 tonna êksportlandı inde.