Törek matbuğatına küzätü 08.05.2018

“Xäbär Türk” gazetında “Greśiya belän kire qabul itü kileşüen tuqtattıq” dip isemlängän xäbär dön’ya kürde.

Törkiyä tışqı êşlär ministrı Mäwlet Çavuşoğlu Antaliyada uzğan “Cirle media oçraşuları” cıyılışında çığış yasadı. Anda 15nçe iyul’dä tüntäreleşkä kereşüdä qatnaşuçılarnı Greśiyadan kitertü belän bäyle soraw yañğıradı. Mäwlet Çavuşoğlu Greśiyanıñ ğamälläreneñ qabul itelmäs buluın telgä aldı. “Greśiya belän ikeyaqlı kire qaytaru kileşüebez bar. Xäzerge waqıtta anı tuqtattıq,”-dide ul.  

“Xörriyät” gazetında “Mattistan Törkiyä belän xezmättäşlek belderüe” digän xäbär çıqtı.

AQŞ saqlanu ministrı Djim Mattis, NATO saqlanu ministrlarınıñ cıyılışında qatnaşu öçen Brüssel’gä oçışlıy, uçaqta jurnalistlarnıñ sorawlarına cawap birde. Anda ul Münbiç mäs’äläsendä ähämiyätle belderülär yasadı. “Törkiyäneñ qanunlı mänfäğat’läre yünäleşendä êşläwneñ ber yulın tabarğa kiräk,”-dide ul.

“Watan” gazetı “Törkiyäneñ bor karbidı texnologiyäse” turında yaza.

Ênergetika häm tabiğıy çığanaqlar ministrı Bärat Albayraq beldergänçä, bor karbidı texnologiyäse belän bor şaxtalarınıñ qıymmäten ike meñ tapqır arttırırğa mömkin. Bu çimalnı tovarğa äyländerep êşlänä. “Östämä kerem 400 dollardan 400 meñ dollarğa üsäçäk,”-di ministr.

“Yaña Şäfaq” gazetında “AQŞ şirkätlärenä “antidemping” soraştıruı” xäbäre iğ’tibarnı cälep itä.

İq’tisad ministrı Nixat Zäybäkçe AQŞnıñ qorıç häm alyuminiyğa östämä tamojnya salımı kertü qararına qarşı qayber çaralar ütkärelüen belderde. “Amerikanıñ böyek şirkätläreneñ yuğarı dairälärdän teräk alıp xaqsız köndäşlek tudıruın beläbez. Xezmättäşlär belän bu şirkätlärgä qarşı antidemping soraştıruın başlaw prośessı xaqında söyläşäbez,”-dide ministr.   

“Star” gazetı “Mistura İstanbulda” dip belderä.

BMOnıñ Süriyä maxsus wäkile Staffan de Mistura Süriyädäge säyäsi prośess xaqında söyläşü öçen İstanbulğa kilde. Ul biredäge räsmi dairälär belän älege mäs’älä turında kiñäşläşte.