Törek matbuğatına küzätü
22nçe noyabr' könne basılıp çıqqan qayber törek gazetlarına küzätü
“Sabah” gazetı Törkiyä ilbaşı Räcäp Tayyip Ärdoğannıñ İstanbulda NATO Parlamentariylar Assambleyasınıñ Közge ğomüm şura cıyılışında yasağan çığışında qurqınıçlar globalläşkän häm köç tigezlekläre üzgärgän çorda qurqınıçlarnıñ beterelüe häm forsatlarnın qazanışlarğa äyländerelüe öçen mäs’älälärneñ tağın da kiñ mäydannarda qaraluı zarurlığın äytüen yaza.
Xäbärgä kürä Törkiyäneñ terror oyışmaları belän Awrupa belän ber gä dönyanıñ qalğan öleşe arasında äyterseñ nığıtma wazifasın başqaruın beldergän Ärdoğan: “Ägär dä bez bu köräştä uñışqa ireşä almasaq, yägni bu nığıtma cimerelsä, terrorçılar taşqın kebek bar dönyada ut açar häm qan qoyar. Bez şunı äytäbez, äydägez bu nığıtmanı zäğiflätü urınına nığıtik. Terrorçılıq belän köräştä Törkiyägä kürsätelgän här yärdäm ul ilneñ üz kiläçägen garantiya astına aluına öleş kertäçäk,” – dide.
“Xäbär türk” gazetı “Rusiyä häm Qıtaydan berençe yullama” isemle yazmasında Törkiyä ilbaşı Ärdoğannıñ 17nçe noyabr’ könne Üzbäkstanğa çınğa aşırğan säfärennän soñ oçqıçta jurnalistlarğa yasağan Şanghay Xezmättäşlek oyışmasında qatnaşu açıqlawınnan soñ Rusiyä häm Qıtaydan berençe cawapnıñ kilüen citkerä.
Gazet yazuınça Rusiyä häm Qıtay Törkiyäneñ äğzalege turında: “Qaznış bulır,” – açıqlawın yasağan. Qıtaynıñ tışqı êşlär ministrı süzçese Ging Şuang ta: “Törkiyä bolay da dialog partnerıbız, xezmättäşlekne üsterergä telibez,” – digän.
“Xörriyät” gazetı “İzrail ilbaşı Hindıstannan êndäşte: Xörmätle dustım Ärdoğanğa sälam!” isemle xäbärendä Hindıstandağı Agrotech yärminkäsendä ber açılışta qatnaşqan İzrail däwlät başlığı Reuven Rivlinnıñ: “Törkiyä belän duslığıbıznıñ häm mönäsäbätlärebezneñ üsäçägen ömet itam, dustım Ärdoğan häm törek xalqına sälam,” – digän süzlären uquçıları belän urtaqlaşa.
“Yäni Şafak” gazetı “Hürkuş qorallana” isemle yazmasında cirle belem birü oçqıçı Hürkuş versiyaläreneñ citeşterelüen xäbär itä.
Xäbärdän kürengänçä Törek Aviaśiya häm ğaläm sänägäte anonim şirkäte TUSAŞ tarafınnan Saqlanu sänägäte kiñäşçelege citäkçelegendä 10 yıl barğan êşçänlektän soñ Hürkuşnıñ qorallı modele öçen äzerleklär başladı.
Gazet yazuınça yaña citeştereläçäk oçqıç Hawa häm ciröste köçläreneñ hawadan yärdäm wazifaların başqara alaçaq. Berençe oçqıç Hawa köçläre komandirlığı inventarenä 2018nçe yılda keräçäk.
