Törek matbuğatına küzätü

“Star” gazetı Törkiyä ilbaşı Räcäp Tayyip Ärdoğan räislegendä pänceşämbe könne uzğan Milli İminlek Şurası cıyılışında 4 yullamanıñ yasaluın yaza.

Xäbärgä kürä bolar: xozurğa yanawçı PKK häm milli iminlekkä yanawçı Parallel’ qorılışqa qarşı köräş däwam itäçäk; birelüdän başqa çarası bulmağan terror oyışması töbäk xalqın wäkillek itä almas; YPG terror oyışmasınıñ Awrupa başqalalarında wäkilçelek açuı duslıqnı beterer; imin töbäk mäcbüri.

“Xäbär türk “ gazetı PKK terror oyışmasınıñ “okoplı üzidarä” xıyalınıñ Sur, Cizrä, Yüksekova, Silopi belän ber rättän 10nan artıq urında operatsiyalär belän çelpärämä kiterelüen citkerä.

Xäbärdän kürengänçä soñğı itep Mardinneñ Nusaybin ilçäsendä ike köndä 67 PKKlı terrorçı birelde. İminlek köçläre sabır belän alıp barğan operatsiyalär PKKnıñ şähärdäge qorılışın cimerde.

Gazet yazuınça oyışmanıñ “çigelegez” boyırığın birüe däğwa itelä.

“Sabah” gazetı “Yaña hawa mäydanında zur yärminkä alanı” isemle xäbärendä tämamlanğaç dönyanıñ iñ zurısı bulaçaq İstanbuldağı yaña hawa mäydanınıñ şaqtıy yaña investitsiyane dä üze belän alıp kilüen yaza.

Xäbärgä kürä İstanbul Säwdä Palatası 76 million metr2 lık alanda qorılaçaq hawa mäydanı yanında zur yärminkä alanı qoru öçen eşkä kereşte. İstanbul şähär xaqimiyäte belän elemtägä kergän. İstanbul Säwdä Palatası 500 meñ m2 dan artıq yärminkä alanı tözergä planlana.

“Xörriyät” gazetı “Beryulı altı büläk” isemle yazmasında Näbi Birgineñ Bolgariyaneñ Varna şähärendä oyıştırılğan Discovery festivalennän büläk alıp qaytuın uquçıları belän urtaqlaşa.

Xäbärdän kürengänçä 25nçese uzğan häm 13 il qatnaşında ütkärelgän festivaldä Birgi Törkiyäne “Lonely Nights, Lonely Dreams” cırı belän wäkillek itte.

Gazet yazuınça çarada Törkiyä “İñ yaxşı ir-at tawışı”, “İñ yaxşı Balad”, “İñ yaxşı cır süzläre”, “İñ yaxşı cırğa jyuri büläge”, “İñ yaxşı çığış” häm “İñ yaxşı xalıqara sälät büläge”nä layıq buldı.