Törek matbuğatına küzätü 20.05.2016

“Sabah” gazetı  "Bayraq 22 yıllık däğwa iptäşenä” dip atalğan yazmasında “Aq” partiyanıñ ğomum başlıq häm premyer-ministr wazıyfası öçen 1994nçe yıldan birle İlbaşı Ärdoğan belän yänäşä bulğan Binali Yıldırımnı namzät itep kürsätüen xäbär itä.

Yazmada bolay diyelä:

“Törkiyäneñ üseşenä qağılışlı marka proyektlarda öleşe bulğan Yıldırım räxmät çığışında anıq yullamalar yasadı häm: "Qoruçı başlığıbız, liderıbız belän bergä här êtaptağı iptäşebez belän tulı ahäñ êçendä êşläyäçäkbez”, - dip äytte. Ğomum başlıq açıqlawınnan soñ berençe säfären Diyarbakır qalasına yasawçı Yıldırım biredä dä: “Qärdäşlegebezne bozarğa berkemneñ dä köçe citmäyäçäk. Watanıbıznı bülergä teläwçelär, gäyepsez keşelärebezne yuq itüçelär cawabın iñ köçle räweştä alaçaq”, - dip äytte.”

“Star” gazetı  "Êş dönyasınnan Yıldırımğa tulı yaqlaw” isemle yazmasında Transport, diñgezçelek häm êlemtä ministrı Binali Yıldırımnıñ “Aq” partiyanıñ ğomum başlıq namzätlegenä êş dönyasınıñ tulayım räweştä yaqlawın yaza. Gazet bedlerüençä, Yıldırım ministr bulğan çaqta başqarğan ğämällärenä işaräläwçe êş dönyası säyäsi häm iqtisadi totrıqlılıqnıñ däwam itäçäge qaraşında berläşte.

“Yäni Şafak” gazetı "İstanbul humanitar sammitına äzer” dip atalğan yazmasında Törkiyädä Berläşkän Millätlär Oyışması tarixında berençe märtäbä oyıştırılaçaq BMO Bötendönya humanitar yuğarı däräcäle oçraşuınıñ uzaçağın belderä. Gazet xäbär itüençä, oçraşu ütkäreläçäk İstanbulda iminlek çaraları yuğarı däräcägä citkerelde. Sammit waqıtında 5 meñ politsiya xezmätkäre wazıyfa başqaraçaq, bombanı tä’sirsez xälgä kiterüçe belgeçlär häm politsiya boralağı da äzer wazğiyättä bulaçaq. Atatörek hawa mäydanında qarşı alınaçaq däwlät başlıqları häm wäkilläre öçen maxsus tärtip urnaştırıldı. Yuğarı däräcäle oçraşu arqasında 24nçe mayğa qädär İstanbuldağı qayber yullar yabıldı häm yünäleşläre üzgärtelde.

“Habärtürk” gazetı "Sancar Nobel bülägen Atağa büläk itte” isemle yazmasında professor, doktor Aziz Sancarnıñ 2015nçe yıl Nobel ximiya bülägeneñ medalen häm sertifikatın İlbaşı Räcäp Tayyip Ärdoğan da qatnaşqan tantanada Anıtkäber mavzoleyına tapşıruın añlata.

Gazet bolay dip yaza: “Sancarnı Nobel ximiya bülägen aluı uñayınnan şäxsän häm millät isemennän täbrik itüen äytüçe Ärdoğan: "Bu medalnıñ Anıtkäberdä täqdir itelüen yäşlärebez öçen kiläçäkkä işarät bularaq küräm häm äle tağın ni çaqlı Nobel büläklären alıp bulır, dip ışanam häm bu üzenä kürä yul kartasın bilgeläw bulaçaq. Bik zur räxmät”, - dip äytte.

Aziz Sancar da: "Bu medalne biregä tapşıru belän Atatörekkä häm Atatörekneñ köräştäşlärenä, Törkiyä Cömhüriyätenä nigez saluçılarğa tuğrılıq burıçımnı tülädem häm şuşı forsatnı miña birgäne öçen Allahğa şöker itäm”, - dip belderde.”

“Hürriyät” gazetı "Törek filmnarı Niderlandta” dip atalğan yazmasında Niderland häm Törkiyä kino yaratuçıların cıyunı maqsat itüçe “Qızıl lalä” film festivaleneñ 27nçe mayda Rotterdamda pärdälären açaçağın xäbär itä.

Gazet yazuınça, festivaldä 4nçe iyüngä xätle zamança törek kinosınnan saylap alınğan näfis film, dokumental film häm qısqa metrajlı filmnarnıñ täqdir itelüe belän bergä panel, fotokürgäzmä, kontsert kebek törle çaralar da ütkäreläçäk. Festivaldä "Ğomer buyı uñış büläge aktrisa Hülya Koçyiğitkä, "Qızıl lalä ostazğa xörmät büläge” dä rejissyor Özcan Alpärgä bireläçäk.