Törek matbuğatına küzӓtü

“Xӓbӓr türk” gazetı “Törkiyӓdӓ kontsert quyarğa telim” isemle xӓbӓrendӓ sörgengӓ cibӓrelgӓn Qırım tatarlarınıň xikӓyӓsen aňlatuçı “1944” isemle cır belӓn Yevrovideniye cır bӓygesendӓ ciňü yawlağan Cӓmilӓneň Törkiyӓ ilbaşı Rӓcӓp Tayyip Ӓrdoğannıň üzenӓ şaltıratıp, tӓbrik itüen hӓm Törkiyӓgӓ çaqıruın ӓytüen yaza.

Xӓbӓrgӓ kürӓ berençe forsatta Törkiyӓgӓ kilӓçӓgen hӓm Ӓrdoğan yanına baraçağın beldergӓn Cӓmilӓ: “Törkiyӓdӓ kontsert quyarğa, andağı tatarlarğa cır cırlarğa telim. Alarnıň xikӓyӓlӓren tıňlawdan bӓxetle bulaçaqmın,” – digӓn.

“Yӓni Şafak” gazetı Süriyӓdӓ “DEAŞ” terror oyışmasına qarşı suğışır öçen qorıluı planlanğan zur armiyaneň Amerika Quşma Ştatlarınıň PKK terror oyışmasınıň Süriyӓdӓge törkeme PYD ügetlӓwe arqasında qorıla alınmawın citkerӓ.

Xӓbӓrdӓn kürengӓnçӓ AQŞ 20dӓn artıq törkem yӓrdӓm kürsӓtkӓn armiyadӓ PYDneň dӓ urın aluın telӓwe söylӓşülӓrgӓ qomaçawlağan.

Gazet yazuınça Xalebneň tönyağında “DEAŞ” terror oyışmasına qarşı suğışır öçen 30 meň keşelek “Tönyaq Armiya” qorılğan. Ӓsӓd armiyasennӓn ayırılğan oppozitsiyaçel ber general-mayor citӓkçelegendӓ qorılğan armiyağa 20dӓn artıq qorallı törkem yӓrdӓm kürsӓtӓçӓk.

“Watan” gazetı “Töyenne Törek hawa yulları çişte” isemle xӓbӓrendӓ Amerika Quşma Ştatlarınıň töyen urını bularaq kürsӓtelgӓn Atlantada Törek hawa yullarınıň oçış çeltӓrenӓ quşıluın yaza.

Xӓbӓrgӓ kürӓ dönyanıň iň küp qullanıluçı Atlanta Hartsfield Jackson Xalıqara hawa mӓydanına İstanbuldağı Atatörek aeroportınnan oçqıç sӓfӓrlӓre düşӓmbe könne başlandı.

Gazet yazuınça dönyadağı şaqtıy ilgӓ sӓfӓr çınğa aşıruçı Törek hawa yulları transfer üzӓge İstanbul aşa 100dӓn artıq ildӓ yaqınça 300 urınğa oçqıç sӓfӓre oyıştıra.

“Star” gazetı “Turizmda İran belӓn urtaq tanıtu planı” isemle yazmasında embargolardan qotılğan İran belӓn iqtisad ölkӓsendӓ xezmӓttӓşleklӓrneň artuın citkerӓ.

Xӓbӓrgӓ kürӓ Törkiyӓneň Mӓdӓniyӓt hӓm Turizm ministrı Mahir Ünal investorlar belӓn bergӓ yasağan İranğa sӓfӓreneň nӓticӓsenӓ bӓyӓ birde. İrannıň turizm asqorımasınıň barlıqqa kiterelüe hӓm ike yaqlı xezmӓttӓşlek mӓs’ӓlӓseneň möhim buluın beldergӓn Ünal İran belӓn bergӓ urtaq tanıtu eşçӓnleklӓren başqaraçaqların açıqladı.

Gazet yazuınça monnan alda Gretsiya belӓn mondıy proyektnı çınğa aşıruların citkergӓn ministr Ünal Mardin, Van, Şanlı Urfa hӓm Tӓhran belӓn urtaq tanıtu eşçӓnlegen alıp baraçaqların belderde.

“Sabah” gazetı “Ğazzӓ festivalendӓ 66 film kürsӓtelde” isemle xӓbӓrendӓ dönyanıň Frantsiyaneň könyağındağı Cannes film festivalenӓ yünӓlgӓndӓ İzrail blokadası astında yӓşӓwçe Ğazzӓdӓ dӓ film festivaleneň oyıştırıluın uquçıları belӓn urtaqlaşa.

Gazet pӓnceşӓmbe könne başlanğan Ğazzӓdӓge Keşe xoquqları film festivaleneň ikençeseneň 5 kön baruın citkerӓ.

Xӓbӓrgӓ kürӓ 12 film, 17 dokumental’ film, 30 qısqa metrajlı film belӓn 7 multfilm kürsӓtelgӓn çaranıň şiğare isӓ “Sulış alırğa telibez” bulğan.