Törek matbuğatına küzätü 14.12.2014
14nçe dekabr könne basılıp çıqqan qayber törek gazetlarına küzätü
“Star” gazetı CİAnıň ütkändä qalğan wäxşi möğamälälärgä reaktsiya beldergän dönyanıň Süriyädäge törmälärdä kürelüçe zolım häm küpläp üterülärgä bitaraf qaluın yaza.
Gazet ildäge rejim törmälärendä terkälmägän 85 meň keşeneň sistematik bularaq intekterelüen citkerä.
“Akşam” gazetı “Mädäniyätlärebezneň nigezendä söyü häm berdämlek bar” isemle xäbärendä Törkiyä ilbaşı Räcäp Tayyip Ärdoğannıň Mäwlana ülemeneň 741 yıllığı uňayınnan oyıştırılğan 3nçe Şäb-i Arus İstanbul çarasında qatnaşuın uquçıları belän urtaqlaşa.
Gazet Ärdoğannıň çarada yasağan çığışında: “Mädäniyätebezneň tözelüendä häm bügengä qadä kilep citüendä Mäwlana äsärläreneň zur öleşe bar. Mäwlananıň xikmätle süzläre zur tuğanlıq atmosferasın qorğan. Bu mädäniyättä berlek, söyü bar, duslıq, berdämlek bar,” – digän süzlären citkerä.
“Milliyät” gazetı “Babacan: 2015 tağın da yaxşı bulaçaq” isemle xäbärendä Premyer-ministr urınbasarı Ali Babacannıň 2015nçe yıl Üzäk idarä byudjet qanunı proyektı belän bäyle söyläşülärdä yasağan çığına urın birä.
Xäbärdän kürengänçä Törkiyäneň iqtisadi kürsätkeçläreneň kiläse çorda tağın da yaxşı bulaçağına işarät itkän Babacan üseşneň 2015tä 2014nçe yılğa kürä tağın da yuğarı bulaçağın äytte.
“Sabah” gazetı “Törkiyä çit il keşeläre öçen ışanıçlı urın” isemle xäbärendä Tözeleş häm tirä-yaq moxitnı saqlaw yuğarı däräcäle oçraşuında çığış yasağan Möstäqil sänägätçe häm eşmäkärlär cämğiyäteneň tözeleş tarmağı şurası başlığı Burhan Özdämirneň süzlären citkerä.
Gazet Özdämirneň: “Törkiyädäge toraq taläbendä 2008dä dönyada barlıqqa kilgän krizistan soň artış küzätelde, çit il keşeläre öçen ilebez ışanıçlı investitsiya urınına äylände,” – digän süzlären uquçıları belän urtaqlaşa.
“Yäni Şafak” gazetı “Türksat 6A öçen qul quyıla” isemle xäbärendä Törkiyädäge Ğilmi häm texnologik tikşerenü oyışması äydäp baruçanlığında häm Törek aviatsiya sänägäte belän Xärbi elektronik sänägäte ASELSAN kebek cirle sänägät oyışmaları yärdäm kürsätkän Türksat 6A proyektınıň başlanuı öçen düşämbe könne imzalarnıň quyılaçağın yaza.
Xäbärdä Türksat 6Anıň 2020nçe yılda ğalämgä oçırtıluınıň maqsat itelüe urın ala.
