Ukraina oçqıçı belän bäyle farazlar

AQŞ ilbaşı Donal’d Tramp Ukraina oçqıçınıñ İranda texnik xilaflıq arqasında kilep töşü farazlarına şöbhälänep qarawın belderde. Aq Yortta kön üzägendäge sorawlarğa cawap birgändä ul bu xaqta ikelänebräk söyläde. “Şöbhälärem bar. Başqalar da şöbhälänä. Faciğale waqıyğa. Tege yaqta beräwlär xata yasağan bulırğa mömkin. Bik awır cirlektä oça ide. Qayberäwlär oçqıçnıñ texnik säbäp arqasında kilep töşüen söyli. Minemçä, monda soraw bilgese bar. Çınlıqta, tögäl genä belmim. Bu mäs’älädä tiskäre xisem bar, anda bik naçar närsä buldı sıman,”-dip söyläde Tramp.

Angliyä xökümäte räise Boris Djonson da oçqıç qazası belän bäyle tikşerüneñ açıq räweştä häm ışandırırlıq alıp barıluın sorap möräcäğat’ itte. “Mäğ’lümatlar Ukraina oçqıçınıñ İrannan cibärelgän raketa tarafınnan bärep töşerelüen kürsätä. Bu yalğışlıq belän êşlängän bulırğa mömkin,”-dide ul.

Kanada xökümäte räise Jastin Tryudo isä, üz ileneñ küzläw oyışması qulında Ukraina oçqıçınıñ İran raketası belän yalğış bärep töşerelüen kürsätüçe dälillär barlığın äytte. Ul raketanıñ töre häm niçek atıluı turında sorawlarğa tögäl cawap birmäde, ämma qullarındağı bik küp sandağı dälillärgä ışanuların belderde.

Tryudo, monnan tış, Törkiyä arqılı İranğa kitü öçen qayber kanadalı diplomatlarnıñ yulğa çığuın häm bu keşelärgä İrannıñ viza mäs’äläsendä yärdäm itäçägen dä citkerde.

Bolarğa cawap itep İran xökümäte süzçese Ali Rebii Ukraina hawa yulları oçqıçınıñ raketa belän bärep töşerelüe farazlarınıñ AQŞnıñ küzallaw operaśiyäse buluın alğa sörde. Ul qazanı tikşerü komissiyäse tözelüen häm waqıyğanıñ açıq, iğ’tibarlı häm tiz räweştä centekläp qaraluın äytte.

İran grajdanlı aviaśiyä oyışması citäkçese Ali Abedzadä isä: “Oçqıç hawada waqıtta yalqın belän çolğandı häm soñınnan şartladı,”-dide. Ul oçqıçnıñ kütärelgän aêroportqa kire qaytırğa mataşuın, ämma buldıra almıyça kilep töşüen söyli.

İsegezgä töşeräbez, İran başqalası Tährannan 176 keşe belän kütärelgän Boing oçqıçı hälakätkä yulıqtı. Anda berkem dä isän qalmadı. Hälaq buluçılar arasında 82 iranlı, 63 kanadalı, 11 ukrainalı, 10 şveśiyäle, 4 äfğan, 3 nemeś häm 3 ingliz belän 9 êkipaj äğ’zası bar ide.

Şul uq säğat’lärdä İrannıñ Ğıyraqtağı AQŞ xärbi bazalarına höcüm itüe säbäple oçqıçnıñ hälakät säbäpläre belän bäyle spekulyaśiyälär yasala.