Tatarstan-Törekmänstan bağlanışları
Rusiyä-Törekmänstan bağlanışları qısalarında Tatarstan belän Törekmänstannıñ üzara xezmättäşlege
Tatarstan İlbaşı Röstäm Miñnexanov Törekmänstanda oyıştırılğan 5nçe Aziya uyınnarın açu tantanasında qatnaştı.
Aşxabadqa êş säfäre qısalarında Tatarstan Däwlät başlığı Röstäm Miñnexanov Törekmänstan İlbaşı Gurbangulıy Bärdimöxämmädov belän oçraştı.
Tatarstan İlbaşı idaräseneñ matbuğat xezmäte belderüençä, sälamläw süzendä Bärdimöxämmädov, Tatarstan İlbaşınıñ böten sport mäs’älälärendä belgeç bularaq bilgele buluına iğtibarnı yünältep: “Tatarstannıñ êre sport çaraların uzdıruda täcribäse bar. “Aziada-2017”ne äzerläw barışında bez sezdän küpkä öyrändek”, - dip äytte.
Röstäm Miñnexanov Gurbangulıy Bärdimöxämmädovnıñ Rusiyä-Törekmänstan bağlanışları qısalarında Tatarstan belän Törekmänstannıñ üzara xezmättäşlegenä zur iğ’tibar birüen bilgeläp ütte. Bügenge köndä, mäsälän, säwdä-iqtisadi, mädäni häm mäğarif, neft’, gaz ölkäsendä konstruktiv êş bara.
Annan soñ Röstäm Miñnexanov Törekmänstan İlbaşına “Duslıq” ordenın tapşırdı.
Tatarstan İlbaşı Törekmänstan säfäre qısalarında ilneñ Ministrlar Kabinetı räiseneñ yağulıq-ênergetika kompleksı mäs’älälärennän cawaplı urınbasarı Maqsat Babaev belän dä küreşep söyläşte.
Äñgämä barışında yaqlar neft’-gaz tarmağında xezmättäşlek mäs’äläläre turında söyläşte. Ayırım alğanda, yatmalarnı tabu häm qullanışqa kertü, çimalnı êşkärtü, tarmaq belgeçlären äzerläw häm başqa mäs’älälär qaraldı.
Mixail Frolov töşergän fotosürätlär tatarstan.ru säxifäsennän alındı.
Bäyläneşle xäbärlär
"TRT tapşırular ölkäsendä ireşkän däräcäse belän törek xalqın ğorurlandıra"
İlbaşı bu xaqta TRTneñ 60 yıllığı nisbätennän yasağan belderüendä citkerde