Törkiyä Böyek Millät Mäclesendä 15nçe iyül' töne

Törkiyä Böyek Millät Mäclese (Törkiyä parlamentı) “Fätullahçı” terror oyışmasınıñ Törek qorallı köçlärenä kerep urnaşqan bertörkem xain xärbilär tarafınnan 15nçe iyül’ kiçendä totınğan tüntäreleş kereşüenä qarşılıq kürsätep, tarix yazdı.

Törkiyä parlamentında törkeme bulğan 4 säyäsi partiya wäkilläre F-16 xärbi oçqıçlarınnan ırğıtılğan bombalarğa qaramastan Ğomum şura zalın taşlap kitmiçä, xätta biregä kilep, däwlätne häm üzlären saylağan watandaşnı saqladı.

Yuğisä Törkiyä Böyek Millät Mäclese äğzaläre televideniye kanalları aşa xalıqqa: “Bez wazıyfabıznıñ başında”, - dip möräcäğät itkän çaqta däräcäle zalnıñ tübäsenä turı kilgän berençe bomba böten binanıñ tetränüenä säbäp bula.

Zalnıñ tüşäme öleşläp-öleşläp kilep töşä, çıqqan tawışlar qolaqlarnı sañğırata, xasil bulğan tuzan tötene arqasında berni kürenmi.

Premyer-ministr Binali Yıldırımnıñ parlamenttağı bülmäse belän bergä şaqtıy urın qullanılmaslıq xälgä kilä.

Şuña kürä dä parlamenttağı iminlek citäkçeläre sıyınır urınnarğa töşärgä kiñäş itä.

Şul mizgeldä böten bolarğa şahit bulğan Ğomum şura mömbärennän Ğädälät ministrı Bäkir Bozdağnıñ tawışı yañğırıy.

Bozdağ Törkiyä Böyek Millät Mäclese başlığı İsmail Kahramanğa möräcäğät itep:

" Xörmätle räis, Parlamentnı biredä yabıp, sıyınır urınğa töşsäk, millät bolardan qurıqtılar dip äyter. Bezneñ yasayaçağıbız närsä – biredä ülergä”, - dip belderä.

Törkiyä Böyek Millät Mäcleseneñ êlekke başlığı Cämil Çiçäk añlatqança, şul uq säğätlärdä İlbaşı Räcäp Tayyip Ärdoğan, “Ğädälät häm qalqınu” partiyası xalıq ışanıçlısı İlknur İncäözgä şaltıratıp, xalıq ışanıçlılarına: “Tarix yazasız”, - dip möräcäğät itä.

Parlament başlığı Kahraman “Ğädälät häm qalqınu” partiyası, “Cömhüriyät xalıq” partiyası häm “Millätçe xäräkät” partiyasınıñ parlamenttağı törkem räis wäkillärenä urtaq belderge iğlan itärgä täqdim itä.

Quldan yazılğan belderge öçen “Xalıqlarnıñ demokratik” partiyası törkem räis wäkile dä telefon aşa raslaw birgännän soñ belderge şäkellänä.

Şul arada Törkiyä Böyek Millät Mäclesen saqlaw departamentı başlığı Nurullah Öztürk koordinaśiyäsendäge parlament poliśiyası al baqçağa xätle töşärgä cör’ät itkän boralaqlarnı çigenderü çarasın başlata. Kerü qapqaları aldında cıyılğan tanklardağı xainlär belän qaynar bäreleşlär yäşänä.

Törkiyä Böyek Millät Mäclesen, bu räweşle watanın häm xalqın üz canın uylamıyça saqlağan çaqta, bälki dä, üz ğailäsennän dä xätta xäbär ala almağan minutlarda üz cannarın fida itärgä äzer bulğan bu batır, qaharman poliśiya xezmätkärläreneñ ber öleşe şrapnel kisäklärennän yaralana.

Uyınnıñ ni çaqlı tübän häm äxlaqsız xisapqa tayanuı töğäyenläşä başlağan mizgellär ide.

Törek qorallı köçläreneñ äğzase buluın alğa sörgän şuşı terrorçı törkeme Törkiyä Böyek Millät Mäclesen bombalıy, törek poliśiyasına ut aça, uramnarğa çıqqan törek milläteneñ östenä tanklar alıp bara.

Bu küreneş, hiçşiksez, barı tik çit il yaw köçläreneñ äsäre bula ala. Barı tik illär arasındağı suğış waqıtında yäşänä alına.

Dimäk, bu millätkä şuşı tönne yäşättergän “FETÖ” äğzaläreneñ törek, möselman, xätta insan, keşe buluına ışanıp bulmıy.

Buldırılmıy qalğan tüntäreleş kereşüennän soñ säğätlär uzğaç Törkiyä Böyek Millät Mäclese ğädättän tış cıyıla.

Parlament başlığı İsmail Kahraman törek xalqına bolay dip möräcäğät itä:

"Millätebezgä bu qayğı-mixnätne yäşätterüçälär layıq bulğan cäzağa xökem iteläçäk. Ğazi Mäcleskä bomba ırğıtıldı. Millätneñ asrawında bulğan, millät qulına qoral birgän êlementlar millätneñ qoçağına qoral terätte. Millätebezgä bu waqiğalarnıñ qabatlanmawın telim, mondıy qara könneñ qabat yäşänmäwen Allahtan telim. Xäzer aqıllı fiker yörtüebezne saqlap qalıp, qatğılıbızdan bernärsä dä yuğaltmıyça, mäs’äläne tamırınnan, nigezennän xäl itü öçen êşläw, yaralarnı beterü waqıtı. Parlament töne buyı demokratiya sağında, näwbätendä ide. Xäzer biredä 4 partiyabıznıñ urtaq tekstnı bergä uqıyaçaqbız, cämäğätçelekkä täqdir itäçäkbez. Xakimiyät – millätnekeder häm cämğiyät monı belderde”.

Kahraman soñınnan urtaq beldergene uqıy.

Tüntäreleş kereşüe häm Parlamentqa qarşı höcümnär kisken räweştä gäyeplängän beldergedä: "Bügen bulğanı kebek kiläçäktä dä milli iradägä häm Ğazi Mäcleskä kütäreläçäk här qul qarşısında Törkiyä Böyek Millät Mäcleseneñ qorıçtay iradäsen, ixtıyar köçen tabaçaq”, - dip äytelä.

Beldergedä Törkiyä Böyek Millät Mäcleseneñ millätneñ demokratiyağa bulğan qaqşamas ışanuın çağıldırırğa däwam itäçägenä basım yasala.

Parlamentta şuşı tarixi mizgellär yäşängän çaqta aldında unmeñnärçä, il külämendä isä millionnarça watandaş qullarında törek bayraqları belän tüntäreleşkä qarşı şiğarlär äytep, iradäsen, parlamentın, ilbaşın, kiläçägen saqlap qalu näwbätendä tora.