Suğış,diplomatiya häm Süriyä tragediyäse

Süriyä suğışı şunı bik açıq kürsätte:diplomatiya mäydanda ğadel köçlär tigezlege xökem sörgändä genä mäğnäle bula ala.

Könbatışlı millätlär Süriyädä säyäsi çişeleş xaqında söyläşkändä Rusiya xärbi höcümnären waqiğalarnıň ağışın üzgärtü öçen arttıra bara.

11 nçe fevraldä doşmanlıqnıň betüe öçen imzalanğan Nyunxen kileşüeneň isä Süriyädäge wäzğiyätne üzgärtüe mömkin tügel kebek kürenä.

Diplomatiya bik möhim rol başqara ala.

Ämma şunı äytergä kiräk, Kreml bik awır baruçı säyäsi söyläşülärgä quşılğan kebek küreneş barlıqqa kiterü öçen dönyanıň här cirenä tışqı eşlär ministrın cibärsä ,ikençe yaqtan Süriyädä köçlär tigezlegen üzgärtü öçen xärbi oçqıçların cibärä.

Rusiya diplomatiyäse Süriyädäge Rusiya xärbi operatsiyäsen yäşerü öçen xezmät itä.

Rusiya tınıç xalıqnı bombalap massaküläm qaçaq ağımı barlıqqa kiterergä häm bu räweşle Awrupa belän Törkiyägä cäza birergä teli.

Süriyädä rejim här kön distälärçä keşene üterüne däwam ittergändä “DEAŞ" terror oyışmasına qarşı alıp barılğan ber yaqlı strategiyäneň äxlaqi legallege soraw astına alırlıq xälgä kilde.

Älbättä “DEAŞ"terror oyışmasına qarşı köräş däwam itärgä häm ul tar-mar itelergä tiyeş.

Ämma bu Süriyä däwlät başlığı Bäşar Äsäd rejimı häm aňa yaqlaw kürsätüçelärgä xärbi ciňü bärabärenä bulmasqa tiyeş.

Üzlärenä küp tapqırlar sıyfatlı yärdäm häm uqıtu-öyrätü programması süze birelgän Süriyä oppozitsiya köçläre ber yaqtan Rusiya häm rejim köçläre tarafınnan zıyan kürgändä ,ikençe yaqtan “DEAŞ"höcümnärenä duçar bula.

Änkara tarafınnan täqdim itelgän häm könbatış tarafınnan ber säbäpsez kire qağılğan Süriyädäge tınıç,basınqı oppozitsiyägä yärdäm itü ,süriyäle qaçaqlar häm tınıç xalıq öçen Süriyädä ışanıçlı,imin töbäklär budıru fikere Atlantik aryağı dairälärdä dä qızıqsınu uyata başladı.

Uzğan yıl ber törkem elekke diplomatlar häm analistlar Amerika Quşma Ştatları ilbaşı Barak Obama häm citäkçelegen Süriyäneň tönyağında Törkiyä çik buyı buylap imin ,ışanıçlı töbäklär buldırırğa çaqırdı.

AQŞnıň elekke Süriyä tulı wäqalätle ilçese Robert Ford 2015 nçe yılnıň 9 nçı mayında bolay dip yazdı:"Süriyä oppozitsiyäsen saqlaw öçen oçış tıyılğan töbäk iğlan itü zarur . Bu isä citäkçelek ozaq waqıt qarşı çıqqan adım".

2015 nçe yılnıň 21 nçe aprelendä AQŞta cömhüriyätçe häm demokrat senatorlar Obamanı Süriyädä iminlek töbäkläre buldırırğa çaqırdı.

Uzğan yıldan birle küp närsälär buldı häm Rusiya üz proyektları öçen kiräkle oçış tıyılğan töbäkne faktik räweştä barlıqqa kiterde.

Yänä dä ışanıçlı töbäk fikere süriyälelärne qotqaru şansına häm tınıç xalıq yäşäwçe töbäklärdä Rusiya belän Äsäd rejimınıň xärbi köç qullanuın çikläw köçenä iyä.

Süriyä suğışı şunı bik açıq kürsätte:diplomatiya mäydanda ğadel köçlär tigezlege xökem sörgändä genä mäğnäle bula ala.

Ägär monnan soň ütkäreläçäk Süriyä söyläşüläreneň tä'sirle buluın telibez ikän xalıqara cämğiyätneň bu söyläşülärgä yaqlaw kürsätüe zarur.

Süriyä oppozitsiyäsenä yaqlaw kürsätmiçä häm süriyäle tınıç xalıq öçen ışanıçlı,imin töbäk budırmıyça torıp alıp barılğan diplomatiyäneň bernindi faydası bulmayaçaq.

Törekçädän tatarçağa Gölgenä Näfis tärcemäse