Tatarstan xäbärläre 58/2023

Röstäm Miñnexanov häm Şäwkät Mirziyayev Qazan Kremlendä oçraşu ütkärde

Tatarstan Räise Röstäm Miñnexanov häm Üzbäkstan prezidentı Şäwkät Mirziyayev Qazan Kremlendä xezmättäşlek mäs’äläläre xaqında fiker alıştı. Bu xaqta Tatarstan Räiseneñ matbuğat xezmäte xäbär itä.

Olı qunaqnı sälamläp, Miñnexanov Rusiyä Federaŝiyasenä räsmi säfäre barışında Üzbäkstan liderın qabul itü mömkinlege Tatarstan öçen zur märtäbä buluın äytte. Tatarstan Räise bu Mirziyayevnıñ respublikağa berençe säfäre buluın bilgeläp ütte häm säyäsätçeneñ Rusiyägä vizitı näq’ menä Tatarstannan başlanuı ayıruça quanıçlı xäl buluın iskärtte.

“Forum öçen zur räxmät. Ul yuğarı däräcädä uzdı. Bez bügen ğamälgä aşıra torğan proyektlar zur sänägät’ predpriyatiyelären genä tügel, ä keçe häm urta biznesnı da qolaçlıy,” – dip iskärtte Röstäm Miñnexanov, Rusiyä häm Üzbäkstan arasındağı III Töbäkara xezmättäşlek forumı näticälären bäyäläp.

Üz çiratında, Üzbäkstan prezidentı Qazannı inde küptän üz küzläre belän kürergä teläwen äytte. “Cılı, açıq yöz belän qabul itkänegez öçen zur räxmät. Här oçraşuıbızda Tatarstanğa kiläçäkmen dip wäğdä itä idem. Häm bügen biredä sezneñ citäkçelektä bara torğan üzgäreşlärne üz küzlärem belän kürdem,” – dide ul.

Qazan Kremle Rusiyäneñ istälekle iñ populyar urınnarı isemlegenä kerde

Qazan Kremle Rusiyäneñ iñ tanılğan häm keşe iñ küp kilä torğan istälekle urınnarı arasında altınçı urınnı aldı. Bu xaqta RİA Novosti agentlığı OneTwoTrip servisına sıltama belän xäbär itä.

Tatarstan başqalası üzägendäge muzey-tıyulıqqa äwerelgän borınğı kirmän Rusiyäneñ istälekle urınnarı arasında bişençe basqıçta urnaştı. Säyäxätlärne planlaştıru xezmäte belgeçläre ütkärgän soraştıruda qatnaşuçılarnıñ 48%ı Qazan Kremlendä bulğan.

Mäskäwneñ Qızıl mäydanı Rusiyäneñ istälekle urınnarı arasında berençe urınnı alğan. Sankt-Peterburgtağı İsaakiyev soborı, Êrmitaj, Petergrof häm Tret’yakov galereyası da Qazan Kremlen uzdırğan. Monnan tış, berençe unlıqqa İzge Troiŝa Sergiyev Lavr, Baykal, Kiji häm Solovki utrawları da kergän.

Soraştıruda qatnaşuçılarnıñ 5%ı älegä berqayda da bulmawların äytkän, “barısı da alda” dip beldergän. Soraştıruda 1900gä yaqın keşe qatnaştı, dip iskärtä oyıştıruçılar.

İstanbulda dön’ya çempionatında tatar aşların täqdim itäçäklär

Bu yılnıñ 23-26 noyabr’ könnärendä Törkiyädä kulinariya buyınça dön’ya çempionatı – Halal Expo uzaçaq. Çarada Tatarstan Respublikası da qatnaşaçaq. Bu xaqta Bötendön’ya tatar kongressınıñ matbuğat xezmäte xäbär itä.

Törkiyädä uzaçaq çara waqıtında böten dön’yadan şef-povarlar cıyılaçaq. Sammit qunaqları dön’yanıñ 50 ilennän kiler dip kötelä – şular arasında Tatarstannı häm tatar aşların täqdim itüçelär dä bulaçaq. Bıyıl alar berençe märtäbä tatar aşların täqdim itäçäk. Tatarstan komandasın Zöfär Ğayazov citäkläyäçäk. Şulay uq komandada xäzer Qazanda yäşäwçe törek yegete – Toprak Açıküz dä qatnaşaçaq.

Bäyge häm sammit qısalarındağı yärminkä – ostalıq däresläre İstanbulnıñ yärminkälär üzägendä uzaçaq. Älege çaranı oyıştıruçılar – İslam illäre standartları häm metrologiyase İnstitutı (SMIIC) häm İslam säwdäsen üsterü berdämlege (ICDT). Çarağa 90 ildän 40 meñ tiräse qatnaşuçı kiler dip kötelä. Şular arasında Tatarstan Respublikası Räise Röstäm Miñnexanov ta çaqırulı.

Üzbäk cırçısı Färrux Zakirovka Tatarstannıñ xalıq artistı iseme birelde

“Yalla” törkemeneñ sänğat’ citäkçese, üzbäk êstrada cırçısı Färrux Zakirov Tatarstannıñ xalıq artistı buldı. Bu xaqta Üzbäkstan başqalası Taşkentta uzğan Räşid Wahapov isemendäge Xalıqara tatar cırı festivaleneñ gala-konŝertında iğlan itelde.

Şunısın da bilgeläp ütärgä kiräk, üzbäk cırçısına Tatarstannıñ xalıq artistı digän maqtawlı isem birü turındağı ukaz älegä basılıp çıqmağan.

Älege kiçädä Üzbäkstan Mädäniyät ministrı Ozodbek Nazarbekov, Tatarstan viŝe-prem’yerı- Tatarstan Respublikasınıñ Rusiyä Federaŝiyasendäge Tulı wäqalätle wäkile Ravil Äxmätşin, cirle tatar diasporası wäkilläre qatnaştı.

Çallıda qan birü akŝiyase oyıştırılaçaq

17 oktäbr’dä Çallı qan üzägendä qan birü buyınça közge akŝiya oyıştırıla. Çarada 18 yäşe tulğan härkem qatnaşa ala. Bu xaqta “Şähri Çallı” xäbär itä.

Akŝiyadä 18 yäş’kä citkän, 55 kilogrammnan artıq awırlıqtağı häm donorlıkka qarşı mediŝina kürsätmäläre bulmağan härkem qatnaşa ala.

Qan üzäge citäkçelege belderüençä, Çallıda yıl sayın 6-7 meñ keşe qan tapşıra. Bügenge köndä isäptä 10 meñ donor bar.