Tatarstan xäbärläre 55/2023
Tatarstan häm tatar dönyasında bulıp uzğan qayber waqıyğalarğa qısqaça küzätü
Tatarstan cömhüriyäte räise Röstäm Miñnexanov parlamentqa yıllıq yullamasın citkerde
14nçe sentyabr’dä Tatarstan räise Röstäm Miñnexanov Däwlät şurasına 2024nçe yıl öçen yullamasın citkerde. Tradiśiyä buyınça, ul älege möräcäğat’neñ tekstın üze äzerli. Miñnexanov yullamasında yılğa qayber yomğaqlar yasıy häm kiläse yıl öçen êş planın täq’dim itä. Tatarstan citäkçese anda 2024nçe yılnı –fänni-texnologik üseş yılı dip iğ’lan itte. Massaküläm mäğ’lümat çaraları Röstäm Miñnexanovnıñ bıyılğı çığışında, başqa yıllar belän çağıştırğanda, tatarça az söyläwen bilgeläp uza. Ber säğat’tän artıq däwam itkän möräcäğatendä ul nibarı 4 minut yarım tatarça söyli.
Xalqıbız kürenekle tatar cırçısı Flyora Söläymanova belän xuşlaştı
14nçe sentybar’dä 84 yäşendä Tatarstannıñ xalıq artistı, kürenekle tatar cırçısı Flyora Söläymanova ozaq waqıtlı awırudan soñ wafat buldı. Anıñ yöräge tönge säğat’lärdä Qazan xastaxanäläreneñ bersendä tibüdän tuqtıy. 1971nçe yıldan Tatar däwlät filarmoniyäseneñ solistkası bulğan cırçını klassik tatar êstradası çorınıñ iñ tanılğan şäxeslärennän berse dip atıylar häm İlham Şakirov, Älfiyä Afzalova belän ber rätkä quyalar.
Flyora Söläymanova belän xuşlaşu Qazannıñ Märcani mäçetendä uzdı. Kürenekle cırçını Kurgan ziratına tanılğan sänğat’ ähelläre cirlängän alleyağa kümdelär.
“Yädäç! İstä!” fil!mı kinoteatrlarda kürsätelä başladı
Tatar rejissyerı Baybulat Batullanıñ “Yädäç! İstä!” fil’mı 14nçe sentyabr’dä Rusiyä kinoteatrlarında kürsätelä başladı häm berençe könnän ük jurnalistlar häm tänqıyt’çelärneñ uñay şärexläwlären aldı. Äsär Tatarstannıñ Balıq Bistäse rayonında töşerelä. Anıñ ike variantı bar: Berse tatar telendä häm rus telendäge subtitrlar belän, ikençese – rus telendä. Anı aktyerlar üzläre dublyajlıy – şunıñ belän dä ul üzençälekle. Fil’mda töp rol’ne başqaruçılarnıñ berse – yazuçı Rabit Batulla.
“Yädäç! İstä!” – Baybulat Batullanıñ berençe tulımetrajlı kartinası. Avgust ayında ul “Koroçe” Bötenrusiyä kinofestivalendä töp büläkne aldı. Ä 9nçı sentyabr’dä Qazan xalıqara möselman kinosı festivalendä kürsätelde.
“Tatar qızı” bäygeseneñ finalı ütte
17nçe sentyabr’dä Üzbäkstanda xalıqara “Tatar qızı” bäygeseneñ finalı uzdı. Bıyıl älege titulnı Penzadan Al’bina Medvedeva yawladı. Aña ciñüçe tacın häm milli xäsitäne Bötendön’ya tatar kongressınıñ Milli şura räise Wasıyl Şäyxraziyev belän 2019nçı yılğı ciñüçe Liliyä Kamilova tapşırdı. Al’bina Medvedevağa, şulay uq, “Lada-Granta” avtomobilen büläk ittelär.
Bilgele bulğança, bäygeneñ xalıqara êtabı törle säbäplär arqasında kiçekterelde. 2021nçe yılğı töbäk ciñüçelären şul uq yılnı Qazanda uzğan yarımfinalda sınadılar. Menä xäzer ike yıldan soñ Üzbäkstanda - 2019nçı yılğı xalıqara êtap ciñüçese Liliyä Kamilovanıñ tuğan cirendä final uzdı.
Tapşırunı äzerlägändä Tatarstan Räiseneñ matbuğat xezmäte, “Tatar-inform” xäbär agentlığı häm “İntertat” gazetı yazmaları qullanıldı.
