Tatarstan xäbärläre - 51/2023

Qazansu yarında uqıtuçılarğa häykäl quyılaçaq

Bu xaqta Tatarstan mäğarif häm fän ministrı İlsur Hadiullin tarmaqnıñ här yıl uzuçı avgust kiñäşmäsendä xäbär itte. Anıñ äytüençä, Qazanda yaña skver buldıru häm Qazansu yılğası buyında uqıtuçılarğa häykäl quyu plannarı bar. Ministr älege êşlärneñ bıyılğa planlaştırıluın belderde. Bilgele bulğança, 2023nçe yıl Rusiyädä Uqıtuçı häm ostaz yılı dip iğ’lan itelde.

Tatarstan mäğarif häm fän xezmätkärläreneñ avgust kiñäşmäse 16nçı avgustta İT-parkta respublika citäkçese Röstäm Miñnexanov citäkçelegendä uzdı.

Mäktäp olimpiadalarında Qazan uquçıları yış ciñä

Bıyıl Qazan uquçıları Bötenrusiyä olimpiadasınıñ yomğaqlaw êtabında 159 prizlı urın yawlağan. Bu uzğan yıl belän çağıştırğanda 17gä kübräk. Bu xaqta Qazan mêrı İlsur Mêtşin xäbär itte.

Bötenrusiyä mäktäp uquçıları olimpiadası ciñüçeläre sanı buyınça Qazan bıyıl da berençe öçlekkä kerde. Annan alda Mäskäw häm Sankt-Peterburg tora. “Ciñüçelärne xalıq sanına bülep isäplägändä bez xätta Rusiyä başqalasın uzıp kitäbez,”-dide İlsur Metşin.

“Tışlıqta - qızlar yılmaya” kürgäzmäse açıldı

“Söyembikä” jurnalı “Tışlıqta – qızlar yılmaya” kürgäzmäsen oyıştırdı. Anda uzğan ğasırnıñ 70-80nçe yıllarında “Azat xatın” jurnalı tışlığında fotoları çıqqan xanımnar belän oçraşu da buldı. “İntertat” êlektron gazetı yazğança, proyekt 2019nçı yılda başlanğan, bıyıl tögällängän. Geroinyalarnı êzläp tabu ciñel genä barmıy, çönki xanımnar kiyäwgä çığıp familiyälären almaştırğan, başqa urınğa küçengän. Oyıştıruçılar, 17 xatın-qıznı êzläp tapqan häm êlemtägä çıqqan. “Tatmedia” binası yanında uzğan çarağa “Azat xatın” jurnalı tışlığınıñ 8 geroinyası kilgän.

“Ana tele” tatar onlayn-mäktäben saqlap qalaçaqlar.

Tatarstanda tatar telen öyrätü öçen açılğan “Ana tele” onlayn-mäktäben yaña platformağa küçerü öçen äzerlek bara. İyün’ başında ul räsmi räweştä yabıluın iğ’lan itkän ide. Säbäbe – proyektnı berlektä başqarğan çit il şirkäteneñ Rusiyä bazarınnan kitüe. Tik Tatarstan Mäğarif häm fän ministrlığı onlayn-mäktäpne saqlap qalaçaqların citkerde. Anda barlıq mobil’ caylanmalar öçen adaptiv versiyä äzerlänüen, funkśionalnı küçerügä yaqınça 6-7 ay kitäçägen äytälär.

Tapşırunı äzerlägändä Tatarstan Räiseneñ matbuğat xezmäte, “Tatar-inform” xäbär agentlığı häm “İntertat” gazetı yazmaları qullanıldı.