Awraziya cömhüriyätläre kön tärtibendäge waqıyğalar

“Awraziya qaytawazı” tapşıruınıñ bügenge çığarılışında Awraziya cömhüriyätläre kön tärtibendäge waqıyğalar xaqında süz alıp barabız.

Uzğan atnada Rusiya Federaśiyäsendä möhim sammit ütte häm Awraziya illärendä iğ’tibarnı cälep itüçe säfärlär buldı.

Gruziya prem’yer-ministrı İrakli Garibaşvili 23-24 nçe iyül’ könnärendä Xorvatiyägä räsmi vizit belän kilde. Ul başqala Zagrebta Xorvatiya prem’yer-ministrı Andrey Plenkoviç belän oçraştı. Plenkoviç Gruziyäne Awrupa Berlegenä äğ’za bulu barışında yaqlawların äytte. Gruziya prem’yer-ministrı Zagrebta üz ileneñ ilçelek binasın açtı.

Gruziya prem’yer-ministrı İrakli Garibaşvili 27 nçe iyül’dä Qıtay Xalıq Respublikasına êş säfäre qıldı. Ul 28 nçe iyül’dä Qıtay däwlät başlığı Si Cinping belän oçraştı. Oçraşu waqıtında ike il arasındağı mönäsäbätlärneñ strategik däräcägä kütärelüe assızıqlandı. Prem’yer-ministr Garibaşvili Çengdu şähärendä ütkärelgän 31 nçe Bötendön’ya universiterları cäyge uyınnaın açu tantanasında qatnaştı.

25 nçe iyül’dä Rusiya, Azärbaycan häm Ärmänstan tışqı êşlär ministrları Mäskäwdä öç yaqlı Qarabax cıyılışı ütkärdelär. Azärbaycan häm Ärmänstan tışqı êşlär ministrları moña qadär 27-29 nçı iyün’ könnärendä AQŞta oçraşqannar ide.

26 nçı iyül’dä Üzbäkstan, Tacikstan häm Törekmänstan tışqı êşlär ministrları onlayn öç yaqlı oçraşu uzdırdılar. Oçraşuda avgust başında Törekmänstanda uzaçaq älege illär ilbaşlarınıñ öç yaqlı sammitınıñ detal’läre qaraldı.

26 nçı iyül’dä Qırğızstan prem’yer-ministrı Akılbäk Caparov Çulpan – Ata şähärendä Azärbaycan viśe-prem’yerı Ali Äxmädov belän küreşep söyläşte. Çulpan - Atada 5 nçe Qırğızstan-Azärbaycan xökümätara iq’tisadi häm sośial’ xezmättäşlek komissiyäseneñ urtaq cıyılışı ütte. Şul uq könne Qırğızstan-Azärbaycan Êş forumı uzdı.

27 nçe iyül’dä Qırğızstanda 7 nçe Issıq kül 2023 xalıqara iq’tisadi forumı ütte. Forumda 400 dän artıq wäkil qatnaştı. Biredä ğomumi bäyäse 2 milliard 500 million dollar bulğan 10 kileşü imzalandı.

27-28 nçe iyül’ könnärendä Sank-Peterburgta Rusiya - Afrika sammitı belän İq’tisadi häm gumanitar forum ütkärelde. Sammitta Afrika qıytğasınıñ 54 ilennän wäkillär qatnaştı. Sammitta çığış yasağan Rusiya Federaśiyäse däwlät başlığı Vladimir Putin Burkina-Faso, Zimbabve, Mali, Somali, Üzäk Afrika Cömhüriyäte häm Êritreyägä 25-50 meñ tonna buşlay aşlıq cibäräçäklären äytte. Rusiya - Afrika partnyerlıq forumı başlığı, tulı wäqalätle ilçe Oleg Ozerov 1990nçı yıllarda Rusiya Federaśiyäse tarafınnan yabılğan Afrikadağı ilçeleklären qabat açaçaqların belderde. Afrika liderlarınıñ sammit qısalarında Rusiya häm Ukrainanı tatulaştıru plannarı käğaz’dä genä qaldı.

İyül’ azağında Azärbaycan häm Üzbäkstan armiyäläre Üzbäkstannıñ Çirçik şähärendä urtaq xärbi künegülär ütkärdelär. İstanbulda uzğan 16 nçı IDEF-23 saqlanu sänäğate yärminkäse qısalarında Azärbaycan saqlanu ministrlığı SU-25 oçqıçların modernizaśiyäläw maqsatınnan Türkiyä aviaśiya häm ğaläm sänäğate (TUSAŞ) belän xezmättäşlek kileşüe imzaladı. Türkiyä aviaśiya häm ğaläm sänäğate (TUSAŞ) şulay uq “ANKA” pilotsız oçu apparatın Qazaqstanda sınap qarawğa kereşüen dä citkerde.