Üzäk Aziya cömhüriyätläre kön tärtibendäge waqıyğalar

Germaniya ilbaşı Frank - Val’ter Ştaynmayer 20-23 nçe iyün’ könnärendä Qazaqstan häm Qırğızstanğa räsmi säfär yasadı. Qazaqstan ilbaşı Qasıym-Cumart Toqayev häm Qırğızstan ilbaşı Sadır Caparov Germaniya däwlät başlığın räsmi tantana belän qarşı aldılar. İlbaşları belän oçraşu waqıtında Germaniyäneñ Üzäk Aziya illäre belän mönäsäbätläre, Qırğızstan häm Qazaqstannıñ Awrupa Berlege belän mönäsäbätläre qaraldı. Germaniya ilbaşı Frank-Val’ter Ştaynmayernıñ bu regionğa säfäre Awrupa Berlegeneñ Üzäk Aziya belän qızıqsınuınıñ konkret kürsätkeçe. Üzbäkstan ilbaşı Şäwkät Mirziyayev ta may başında Germaniyädä bulğan ide.

22 nçe iyün’dä Azärbaycan ilbaşı İlham Aliyev Baqığa räsmi säfär qılğan Qazaqstan prem’yer-ministrı Alixan Smailovnı qabul itte. Oçraşuda ike yaqlı mönäsäbätlärneñ torışınnan qanäğat’lek belderelde. Şul uq könne Smailov Azärbaycan prem’yer-ministrı Ali Asadov belän oçraştı. Söyläşülärdän soñ ike il xökümätläre arasında 10 kileşü imzalandı.

26-27 nçe iyün’ könnärendä Qırğızstan parlamentı başlığı Nurlanbäk Şakiyev Qazaqstanğa räsmi vizit belän kilde. Şakiyev Astanada Qazaqstan ilbaşı Qasıym-Cumart Toqayev, Qazaqstan parlamentınıñ tübän palatası mäcles başlığı Yerlan Koşanov, parlamentnıñ yuğarı palatası senat başlığı Maulen Aşimbayev belän oçraştı. Oçraşular waqıtında ike il mönäsäbätlärenä qağılışlı mäs’älälär qaraldı.

29 nçı iyün’dä Qazaqstan ilbaşı Qasıym-Cumart Toqayev Lyuksemburg tışqı êşlär ministrı Jan Assel’bornnı qabul itte. Oçraşuda Qazaqstan belän Lyuksemburg arasındağı ike yaqlı mönäsäbätlär häm Awrupa Berlege belän mönäsäbätlär turında söyläştelär. Vizit qısalarında Qazaqstan belän Lyuksemburg arasında ike memorandum imzalandı.

Şul uq könne Qazaqstan parlamentı Nursoltan Nazarbayevnı anıñ isemen yörtkän universitet, mäktäp häm waqıfnıñ idarä şurasınnan çığarğan qanun qabul itte.

26 nçı iyün’dä Mongoliya prem’yer-ministrı Oyun-Êrden Lyuvsannamsreyn Qıtay Xalıq Cömhüriyätenä räsmi säfär belän kilde. Mongoliya prem’yer-ministrı 28 nçe iyün’dä Qıtay prem’yer-ministrı Li Śyan belän oçraştı. Oşraşu axırında ike il arasında 5 kileşü imzalandı. Mongoliya prem’yer-ministrı Oyun-Êrden Lyuvsannamsreyn säfär qısalarında Bötendön’ya iqtisadıy forumında qatnaştı.

29-30 nçı iyün’ könnärendä Ulan-Batorda 1 nçe xatın-qız tışqı êşlär ministrları oçraşuı ütte. Bu oçraşuda tışqı êşlär wazıyfasın başqaruçı xatın-qız ministrlar, Berläşkän Millätlär Oyışması, xalıqara häm regional’ oyışmalarnıñ xatın-qız wäkillare qatnaştılar. Oçraşunıñ açılışına Mongoliya ilbaşı Uxnaagiyn Xürêlsüx tä kilde. Mongliya parlamentı başlığı Gombojav Zandanşatar oçraşuğa kilgän qunaqlarnı qabul itte. İke kön däwam itkän cıyılışlarda gender tigezlege häm keşe xoquqları turında söyläştelär.

Waqıyğalardan kürengänçä, Üzäk Aziya illärendä möhim xalıqara oçraşular däwam itä. Säfärlär Üzäk Aziya illäre arasındağı mönäsäbätlärne nığıta.