Tatarstan xäbärläre 41/2023

Röstäm Miñnexanov: Törkiyä – Tatarstannıñ äydäp baruçı çit il partnyerlarınıñ berse

9 nçı iyün’dä Tatarstan Respublikası Räise Röstäm Miñnexanov citäkçelegendäge respublika sänäğät’çeläre delegaśiyäse Türkiyägä êş säfärenä kilde. Alar Rusiya Federaśiyäseneñ Türkiyädäge Ğadättän tış häm tulı wäqalätle ilçese Aleksey Çexov belän oçraştılar.

“Tatarstan bezneñ däwlätlär arasında näticäle êlemtä çılbırı bulırğa omtıla” ,- dip bilgeläp ütte Röstäm Miñnexanov.

Ul Türkiyäneñ Tatarstannıñ äydäp baruçı çit il partnyerlarınıñ berse buluın iskärtte. Uzğan yıl näticäläre buyınça ike il arasında tovar äyläneşe 1 milliard 200 million dollar täşkil itte, üseş ike tapqırdan artıq.

Delegaśiya şulay uq Türkiyä häm Tatarstan predpriyätiyeläre arasındağı täcribäne öyränü häm mömkin bulğan xezmättäşlekne cayğa salu maqsatınnan berniçä zavodta buldı.

Röstäm Miñnexanov tatarstanlılarnı Rusiya köne belän qotladı

Tatarstan Räise Röstäm Miñnexanov 12 nçe iyün’ - Rusiya köne  uñayınnan respublika xalqına qotlaw belän möräcäğat’ itte. Ul bu bäyrämneñ  ata-babalarıbızğa, ilebez tarixına ixtiramlı mönäsäbät , ütkändäge, şulay uq bügenge köndäge xezmät häm xärbi batırlıqlar simvolı bulıp toruın iskärtte. Monnan tış , Röstäm Miñnexanovnı bäyräm belän Rusiya Federaśiyäse däwlät başlığı Vladimir Putin da qotladı.

Tatarstan Räise Toqayevqa Qazaqstanda urman yanu säbäple qayğı urtaqlaşu xatı cibärde

Tatarstan Räise Röstäm Miñnexanov Qazaqstan ilbaşı Qasıym-Cumart Toqayevqa ilneñ könçığışındağı zur yanğında keşelär ülü säbäple qayğı urtaqlaşu xatı cibärde.

“Tatarstanda Qazaqstandağı masştablı urman yanğınnarı häm tabiğat’ bäla-qazası belän köräş barışında qorbannar buluı turındağı xäbärne bik qayğırıp qabul ittek. Yaqınnarın yuğaltqan ğailälärgä qayğı urtaqlaşuımnı, şulay uq zıyan kürüçelärgä tizräk sawığuların teläwemne citkerüegezne sorıym. Bu yuğaltularnıñ xäsräten çın küñeldän urtaqlaşabız, tuğandaş xalıq belän bergä qayğırabız”,- diyelä Tatarstan Räise xatında.

Qazaqstannıñ Abay ölkäsendäge urman yanğınnarı qorbannarı istälegenä 12 nçe iyün’ ğomummilli matäm köne iğ’lan itelde. Soñğı mäğ’lümatlarğa qarağanda, 60 meñ gektar mäydandağı yanğında 14 keşe hälaq bulğan.

Tatarstan xacilarınıñ berençe törkeme izge urınnarğa yul tottı

8 nçe iyün’dä möfti Kamil Sämiğullin “Qazan” xalıqara aêroportında Tatarstan xacilarınıñ berençe törkemen izge urınnarğa ozattı. Xacğa barlığı 48 möselman yul tottı. “Sez üz tormışığızda iñ möhim säfärgä quzğaldığız. Xacda sınawlar küp bulaçaq, şunlıqtan hiçşiksez sabırlıq kürsätergä kiräk. Ber tapqır tävaf qılğanda keşeneñ 70 meñ gönahı kiçerelä, yäğ’ni Allahı Täğalä qarşında däräcägez 70 meñ tapqır arta”,- dip möräcäğat’ itte Kamil xäzrät möselmmanarğa aêroport terminalında uzğan oçraşu waqıtında.

Ul şulay uq möselmannarğa säfärdä qurqınıç xällärgä yulıqmas öçen üz kiñäşlären citkerde häm böten närsädä törkem citäkçeläre belän kiñäşläşergä çaqırdı, xacilarnı qızıqsındırğan sorawlarğa cawap birde.

Bıyıl respublikadan xacğa 1 meñ 800 möselman yul totaçaq. Soñğı törkem izge urınnarğa 22 nçe iyün’dä quzğala. 

Tatarstannıñ 4 universitetı Rusiyäneñ iñ yaxşı 100 yuğarı uqu yortı isemlegenä kergän

“RAEX” agentlığı versiyäse buyınça, Rusiyäneñ iñ yaxşı 100 yuğarı uqu yortınıñ yaña reytinğı çıqtı. İsemlekkä Tatarstannıñ 4 universitetı kergän. Alar arasında Qazan federal’ universitetı (KFU) da bar, uzğan yıldağı kebek, ul reytingta 20 nçe urında qalğan.

Rusiya sälamätlek saqlaw ministrlığınıñ Qazan däwlät mediśina universitetı (KGMU) 40 nçı urında, Aleksey Tupolyev isemendäge Qazan milli tikşerenü texnik universitetı (KAİ) 47 nçe urında. Qazan milli tikşerenü texnologiya universitetı (KNİTU) 74 nçe urınnı alğan.

İskärtep uzabız, uzğan yıl şuşı uq reytingqa Tatarstannıñ 6 yuğarı uqu yortı kergän ide. Bıyılğı reytingqa İnnopolis universitetı häm Qazan däwlät arxitektura - tözeleş universitetı (KGASU) êläkmägän.

Türkiyä aviakompaniyäse Qazannan İstanbulğa daimi reyslar aça

“Qazan” aêroportınıñ yaña xezmättäşe, Türkiyäneñ “Pegasus Airlines” aviakompaniyäse 19 nçı iyün’dä İstanbulğa daimi köndälek reyslar aça.

Tatarstan başqalası aêroportı üz tarixında berençe tapqır İstanbulnıñ ber’yulı ike aêroportında reyslarğa xezmät kürsätä başlıy. “Pegasus Airlines” aviakompaniyäse İstanbulnıñ Sabixa Gökçän isemendäge aêroportına reyslar yasayaçaq. Oçqıçlar Qazannan düşämbe könne 12.20, sişämbe -15.35 , comğa häm yäkşämbedä 14.20, pänceşämbedä 12.20, şimbä könne 16.10 säğat’tä quzğalıp kitä. Raspisaniye bıyılnıñ oktyabr’ axırına qadär ğamäldä. Yulçılarğa 186 urınlı Airbus A320 hawa sudnoları xezmät kürsätäçäk. Oçış 5 säğat’kä yaqın däwam itä.

Bügenge çığarılışta Tatarstan Räiseneñ matbuğat xezmäte belän “Tatar-inform” xäbär agentlığı yazmaları qullanıldı.