Qawıqtan qotılu yulları

“Sälamät bulıyq” tapşıru tezmäbezneñ bu bülemendä süz qawıqnı beterü öçen tabiğıy çaralar turında süz baraçaq.

Qawıq – qıçıtu häm baş tireseneñ qubuı belän küzätelüçe tire awırtuı. Ul yoğışlı tügel.

Qawıqnı däwalağanda yäş’ne häm baş tireseneñ bozıluınıñ nindi däräcädä buluın isäpkä alırğa kiräk. Bik köçle qawıqlanu bulğanda dermatologlarğa möräcäğat’ itü möhim. Baş tirese urtaça däräcädä zarar kürgän bulsa, tabiğıy däwalaw yulları da yärdäm itärgä mömkin. Tik aña başlağançı, hiçşiksez, tire awıruları belgeçeneñ dä fikeren beleşegez.

Çäçtäge qawıqqa qarşı köräşü yulları

• Qawıqnı beterü öçen yäşäw räweşen üzgärtergä kiräk.
• Stress belän idarä itärgä öyränegez: stress qawıqlanunıñ iñ alda kilüçe säbäpläre arasında. Mondıy mizgellärdä açuığıznı kontrol’ itep, borçılu häm täşwiştän yıraq torığız.
• Qoyaş nurı qawıq problemasın beterügä uñay täêsir itä. Şuña kürä tiyeşle säğat’lärdä baş tiregezne qoyaşta açıq totarğa tırışığız.
• Çäçlärne atnada 2-3 tapqır yuarğa kiräk. Tik monıñ öçen qullanğan sunıñ salqın yäisä qaynar bulmawına iğ’tibar itegez.
• Çäçläregezne yuğanda sabın yäisä şampun’nı tulısınça çığarıp beterü öçen yaxşılap çayqağız.
• Forma birä torğan çaralarnı qullanmağız: çäç laqları, gel’lär, kübeklär baş titeseneñ tağın da qatıraq maylanuına kiterä ala. Ximik matdälärdän toruçı älege êşlänmälär qawıqlanunı arttıra.  
• Bik nıq qawıqlanğan çorlarda fen, bödrälätüçe häm tigezläşterüçe şikelle çäç töplären kipterä torğan çaralarnı qullanmasqa tırışığız.
• Sälamät tuqlanığız: śink häm B vitaminı nisbätennän bay azıq-tölekne qullanmaw da qawıq kiterep çığara ala. Älege matdälärgä östenlek birsägez, baş tiregez tağın da sälamät bulır. Organizmğa A,B vitaminnarı häm śink kerüen arttıru - älege matdälär citmäw säbäple başlanğan qawıqlanunı beterüdä bik ähämiyätle.
• Qawıqtan qotılunıñ iñ caylı yulı - qawıq beterä torğan şampun’nar qullanu. Ägär baş tirese maylı ikän, kön sayın yuu näticäle bulaçaq.
• Qawıqlı keşedä seboreya dermatitı yäisä moña oxşaş başqa awırtu bulırğa mömkin. Dermatologlar çäçne häm baş tiresen tikşerep diagnoz quyaçaq.

 Tabiğıy kiñäşlär:

1. Tabiğıy formulalı şampun’

Qabatlanıp toruçı qawıq problemasına çik quyu öçen baş tiresendäge maynı balanslawçı, pilinglawçı şampun’narğa östenlek birergä kiräk. Ägär qawıqqa çäç tireseneñ çiktän tış qorı buluı säbäpçe ikän, parabensız şampun’ qullanu ähämiyätle.

1. Tabiğıy alma serkäse

Qawıqnı beterüdäge tabiğıy çaralarnıñ berse – organik alma serkäse. Monıñ öçen ber kasä êçenä su quyarğa häm beraz alma serkäse salıp bolğatırğa kiräk. Çaçne yuğannan soñ iñ axırdan älege qatnaşma belän çayqarğa kiñäş itelä.  

1. Tabiğıy maylar

Çäçtäge qawıq probleması öçen tağın ber çara – şampun’ êçenä tabiğıy aromaterapiyä öçen êfir mayları östäw.

Borıç bötnege êfir mayı: härwaqıt qullana torğan şampun’nıñ êçenä 20 tamçı älege maynı östägez. Çäçegezne anıñ belän yua başlağannan soñ küpmeder waqıt ütkäç qawıqlardan qotılırsız.

Çäy ağaçı êfir mayı: ul qawıq bakteriyäläreneñ simptomnarın ciñeläytergä yärdäm itä alırlıq köçle antimikrob häm yalqınsınunı beterü üzençäleklärenä iyä. Çäy ağaçı êfir mayı qawıq barlıqqa kilügä säbäpçe gömbä töre belän köräştä täêsirle.

Tirese bik sizger keşelärdä çäy ağaçı mayı qızarular kiterep çığara ala. Şuña kürä turıdan-turı tiregä sörtkänçe, kokos mayı şikelle başqa çaralar belän bergä quşıp sörtep qararğa kiräk.  

Kokos mayı: ul qawıq barlıqqa kiterüçe mikrob faktorları belän köräşä.  Şulay uq tireneñ dımlılığın arttıra, êkzemä häm qawıq simptomnarın kimetä.

Aloê vera: anıñ mikroblarğa häm gömbägä qarşı köräşüçe üzençälekläre bar. Şuña kürä qawıqqa qarşı da faydalı bula ala.

Baş tiresen dımlandıru öçen çäçäk mayları belän masaj yasaw da näticäle. Çäç töpläreneñ tabiğıy dımlılığın kire qaytaru öçen romaşka suın da qullanırğa mömkin.  

4.Probiotiklarnı arttıru

Probiotik qullanunı arttırunıñ urtaça häm köçle qawıq problemasın kimetüe kürenä. Alarnıñ immun sistemasın köçäytep qawıq barlıqqa kilügä çik quyuı farazlana.

5.Tuqlanuğa Omega-3 östäw

Omega-3 may kislotaları tire sälamätlege öçen zur ähämiyätkä iyä. Ul tireneñ may bülep çığaruı häm dımlandırıluına yärdäm itä, şul uq waqıtta yaralarnıñ tözälüenä bulışa häm irtä qartayunı buldırmıy. Omega-3 may kislotaları citmäw qorı çäçlär, kipkän tire häm qawıq şikelle bilgelärdä kürenä ala.

Söläyman balığı, ala balıq häm skumbriyä şikelle maylı balıqlar iskitkeç Omega-3 may kislotası çığanağı. Monnan tış, daruxanälärdä satıluçı balıq mayı yäisä kinder häm çiyä orlıqları, ästerxan çikläwege şikelle Omega-3kä bay rizıqlar qullanunı arttırırğa mömkin.

6.Aş sodası yäisä köpşäkländerüçe

Qawıqqa qarşı köräşüdä näticäle çaralar arasında yüeş çäç töplärenä beraz aş sodası yäisä qamır köpşäkländergeç sörtep barmaq oçları belän massaj yasaw da bar. Soñınnan çäçlärne çayqarğa kiräk.

Tabib Mäxmät Uçar äzerlägän kiñäşlär