Tatarstan xäbärläre 31/2023

Respublikada “Mäskäw-Tatarstan” xalıqara forumına äzerlek bara. Ul 8nçe aprel’dä Rusiyä başqalasında uzaçaq. Forumnı Tatarstannıñ Rusiyädäge tulı wäqalätle wäkillege oyıştıra. Çarada yıl sayın Tatarstan räise Röstäm Miñnexanov qatnaşa, dip xäbär itä Tatar-inform mäğ’lümat agentlığı.  

“Mäskäw-Tatarstan küpere” forumı unikal’ mäydançıq, anda törle ölkälärdä uñışqa ireşkän spikerlar şäxsi täcribälärenä tayanıp, yäş’lärgä hönär saylaw, quyılğan maqsatlarnı ğamälgä aşıru kiñäşläre birä.

-

Tağın ber zur çara - “Rusiyä – İslam dön’yası: KazanForum” xalıqara iq’tisadi forumın uzdıruda yärdäm itü öçen 838 volontyer äzerlänäçäk. Alarnı saylap alu başlandı dip xäbär itä Tatarstan yäş’lär êşläre ministrlığınıñ matbuğat xezmäte. Volontyer bulu öçen ğarizalar 20nçe aprel’gä qadär qabul itelä. Saylap alınğan üzixtıyarıylarnı räsmi programma, attaşe häm servis yünäleşlärendä äzerläyäçäklär.

“Rusiyä – İslam dön’yası: KazanForum” xalıqara iq’tisadi forumı 18nçe häm 19nçı mayda Qazan Êkspo üzägendä bula.

-

Tatarstannıñ küp rayonnarında qır êşläre başlandı. Bu xaqta awıl xucalığı häm azıq-tölek ministrınıñ berençe urınbasarı Nail Zalakov citkerä. Anıñ äytüençä, 38 muniśipal’ berämlek 77 meñ gektar mäydanda ucım kul’turaların häm küp’yıllıq ülännärne tuqlandıruğa kereşte. Aznaqay, Çüpräle, Yutazı, Çirmeşän, Alekseyevsk häm Zäy rayonnarı 1,2 meñ gektar mäydanda çäçüleklärne saylap tırmalıy başladılar. Şul uq waqıtta xucalıqlarda texnikanı äzerläw tögällänep kilä. Xäzerge waqıtta traktorlarnıñ äzerlege 99%, çäçü häm cirne êşkärtä torğan maşinalar tulı külämdä remontlanğan dip yaza Tatarstan räiseneñ matbuğat xezmäte.

-

Aprel’neñ berençe könennän Tatarstanda sanitar-êkologiyä ikeaylığı başlandı. Ul çüpleklärne beterü häm qıştan soñ territoriyälärne tözekländerü maqsatınnan oyıştırıla. Tatarstan êkologiyä häm tabiğıy resurslar ministrı Aleksandr Şadrikov älege êşneñ aktual’legen häm kiräklegen assızıqlıy. “2022nçe yılda ikeaylıq qısalarında barlıq küzätçelek oyışmaları tarafınnan 4,5 meñ çüplek açıqlandı, alarnıñ 85%ı ikeaylıq azağında beterlde, qalğannarın yıl däwamında çistartqannar,”-dide ul. Sanitar-êkologiyä ikeaylığı çorında respublikada vertolyet belän küktän küzätü häm timer yul liniyäläre buylap komissiyälär tikşerü uzdıra.

-

5nçe aprel’ könne Robert Miñnullinnıñ “Mäxäbbätle közlärem” dip isemlängän yaña kitabın täq’dim itü kiçäse uzaçaq. Anda ädipneñ yaña şiğır’läre häm êlegräk yazılğan saylanma äsärläre urın alğan. Bu xaqta Tatarstan Yazuçılar berlegeneñ matbuğat xezmäte xäbär itä.