Kön’yaq Qavqaz illäreneñ kön tärtibendäge waqıyğalar

Uzğan atnada Kön’yaq Qavqaz Cömhüriyätlärendä möhim oçraşu häm säfärlär oyıştırıldı. Xäzer alarğa küz salıp uzıyq.

Azärbaycan ilbaşı İlham Äliyev 27 fevral’ könne Rusiyä Federaŝiyase tışqı êşlär ministrı Sergey Lavrovnı qabul itte. Söyläşüdä ike yaqlı mönäsäbätlärne qızıqsındıruçı törle mäs’älälär, regional’ xezmättäşlek häm problemalar qaraldı. Sergey Lavrov ike könlek Baqığa säfäre qısalarında Azärbaycanlı xezmättäşe Ceyhun Bayramov belän dä kiñ qırlı söyläşü ütkärde.

Rusiyä häm Ärmänstan tışqı êşlär ministrları 3 martta Hindstanda küreşep söyläşte. Ararat Mirzoyan häm Sergey Lavrov arasında ütkän söyläşüdä Azärbaycan-Ärmänstan arasında tınıçlıq urnaştıru barışı quzğatıldı. Ärmänstannıñ soñğı waqıtta Hindstan belän yaqın xezmättäşlek başqaruı iğtibarnı cälep itä.

2 martta Ärmänstan prem’yer-ministrı Nikol Paşinyan Germaniyağa êş säfäre belän bardı. Berlinda Paşinyan Germaniya Kanŝlerı Olaf Şol’ŝ belän küreşte. Söyläşüdän soñ matbuğat oçraşuı oyıştırıldı. Nikol Paşinyan 3 mart könne Germaniya däwlät başlığı Frank Val’ter-Ştaynmayer belän küreşep söyläşte. Ärmänstan prem’yerı şulay uq Germaniya Parlamentında xalıq ışanıçlılarına möräcäğat’ itep çığış yasadı. Paşinyan Germaniyadä yasağan açıqlawlarında Türkiyä belän mönäsäbätlärne cayğa salırğa teläwlären qabatladı.

Rusiyä watandaşlığınnan çığıp, Qarabaxka kilgän häm cirle citäkçelek prem’yer-ministrı bulğan Ruben Vardanyan Azärbaycan basımı näticäsendä wazifasın taşlarğa mäcbür qaldı. Ğomumän Qarabaxtağı wazğıyät’ Rusiyä häm Könbatış arasında bäxäs mäs’äläse bulırğa däwam itä. Rusiyä Awrupa Berlegeneñ Qarabaxka cibärgän küzätüçelärennän tınıçsız. Dekabr’ ayındağı 3 yaqlı (Rusiyä – Azärbaycan – Ärmänstan) cıyılışnıñ Ärmänstan tarafınnan ğamäldän çığarıluı, prem’yer-ministr Paşinyannıñ Kollektiv qurqınıçsızlıq kileşüe oyışması oçraşuınıñ näticäse beldergesenä qul quymawı, oyışma 2023 yılda Ärmänstanda oyıştıraçaq xärbi künegülärneñ beterelüe kebek täraqqıyät’lär Rusiyä-Ärmänstan mönäsäbätläreneñ soñğı waqıtta telängän däräcädä bulmawın kürsätä.

2 mart könne Baqıda Bäyläneşsez xäräkätneñ Kovid-19 belän köräş êlemtä törkeme oçraşuı uzdı. Oçraşuda Bosniya-Gerŝegovina, Ğıyraq, Liviya, Üzbäkstan häm Törekmänstan däwlät başlıqları, Kuba, Gabon, Tanzaniya ilbaşı urınbasarları, Aljir häm Keniya prem’yer-ministrları, Berläşkän Millätlär Oyışması, Törki däwlätlär oyışması kebek xalıqara oyışma citäkçeläre, barlığı 70 ildän wäkillär qatnaştı. Oçraşu azağında Baqı Deklaraŝiyase qabul itelde. Oçraşu qısalarında däwlät başlığı İlham Äliyıv liderlar belän ike yaqlı söyläşülär ütkärde.

Azärbaycan Bäyläneşsez xäräkäteneñ çirattağı räise wazifasın iñ yaxşı räweştä başqardı. Kovid-19 waqıtında Azärbaycan 80nän artıq ilgä yärdäm kürsätte. Bäyläneşsezlär xäräkäte oçraşuı häm çirattağı räise wazifası Azärbaycannıñ xalıqara ölkädäge ähämiyäten arttırdı.

Ärmänstannıñ Azärbaycan belän bulğan problemaların başqalarına şiqayät’ itüe, Tähran citäkçelegeneñ qayber provokativ adımnarı Azärbaycannıñ üseşenä qomaçawlamayaçaq. Rusiyä belän üsterelgän strategik xezmättäşlek, Könçığış-Könbatış häm Kön’yaq-Tön’yaq transport koridorlarında Azärbaycannıñ möhim ilgä äylänüe monıñ kürsätkeçe bulıp tora.

Avtor - Abdrasul İsakov