Tatarstan xäbärläre 25/2023

Röstäm Miñnexanov tatarstanlılarnı Xalıqara tuğan tel köne belän qotladı

Tatarstan räise Röstäm Miñnexanov respublikada yäşäwçelärne Xalıqara tuğan tel köne belän täbrik itte.

“Tel belemneñ açqıçı, aqılnıñ basqıçı. Xalıqara tuğan tel köne belän!”-dip yazğan respublika citäkçese tuğan tellärne öyränü temasına videorolik ta urnaştırğan.

Yıl sayın 21 nçe fevral’dä böten dön’yada Xalıqara tuğan tel köne bilgeläp ütelä. Ul 1999 nçı yılnıñ noyabrendä YUNESKO General’ konferenśiyäsendä iğ’lan itelde häm 2000 nçe yıldan birle barlıq illärdä tel, mädäni küptörlelek häm küptellelekne xuplaw maqsatınnan bäyräm itelä dip belderä “Tatar-inform” mäğ’lümat agentlığı.

Tatarstan Räise IDEX-2023 kürgäzmäsendä buldı

Kiçä Tatarstan Räise Röstäm Miñnexanov Berläşkän Ğaräp Ämirlekläre çaqıruı buyınça Abu-Dabida IDEX-2023 xalıqara kürgäzmäsen açuda qatnaştı. Tatarstan predpriyätiyeläre kürgäzmädä 1995 nçe yıldan birle qatnaşa.

Röstäm Miñnexanov predpriyätiyelär produkśiyäse belän tanıştı dip xäbär itä Tatarstan Respublikası Räiseneñ matbuğat xezmäte.

Ul şulay uq Tawazun pavil’onında buldı. Tawazun Ämirleklär xoldingı Alabuğa şähärendä avtomobil’lär citeşterü buyınça AURUS proyektınıñ 36%ına iyä. Kompaniya saqlanu citeşterülären ber urında tuplaw öçen tözelgan sänäğat’ parkın täq’dim itä.

Röstäm Miñnexanov Türkiyäneñ Au-Dabida açılğan IDEX-2023 kürgäzmäse pavil’onında da buldı. Ul Türkiyäneñ aviaśiya êşlänmäläre belän tanıştı. Oçraşuda Türkiyä yağı Qazan vertolyet zavodı belän xezmättäşlek itüdä qızıqsınuın belderde. Röstäm Miñnexanov kompaniya wäkillären respublikanıñ sänäğat’ potenśialı belän tanışu öçen KazanForumğa çaqırdı.  

Xäyriyäçe Söläyman Kärimov Türkiyä häm Süriyägä yözär million sum aqça küçergän

Xäyriyäçe Söläyman Kärimov Türkiyä häm Süriyädä bulğan cir teträwlärdän zıyan kürüçelärgä yözär million sum aqça küçerde. Anıñ bu izge ğamälenä Rusiya möselmannarınıñ ruxi liderı, möfti şäyex Rawil Ğaynetdin üzeneñ xäyer-fatixasın birde. Bu xaqta Rusiya Möftilär şurasınıñ matbuğat xezmäte xäbär itä.

Distälägän meñ keşeneñ ğomeren özgän tabiği bäla-qaza rusiyälelärne dä bitaraf qaldırmadı. İlneñ barlıq poçmaqlarında aqça häm kiräkle äyberlär cıyalar. Söläyman Kärimov küçergän aqça zıyan kürüçelärgä yärdäm itüdä sallı öleş bulıp tora.

Qazanda şäkertlär arasında tatar tele, ädäbiyatı häm tarixı buyınça olimpiada uzaçaq

Qazanda Tatarstan mädräsäläre häm İslam yuğarı uqu yortları şäkertläre arasında tatar tele, ädäbiyatı häm tatar xalqı tarixınnan III Respublikaküläm olimpiada oyıştırılaçaq. Bu xaqta Tatarstan Respublikası Diniyä näzaräte matbuğat xezmäte citkerä. Olimpiada tatar telen, ädäbiyatın häm tatar xalqı tarixın öyränü, saqlaw häm üsterü öçen östämä şartlar tudıru, yäş’ buında telne öyränügä qızıqsınu uyatu, tatar mädäniyätenä xörmät tärbiyäläw, tel häm söyläm kul’turasın kamilläşterüne küzdä tota. Älege bäygedä Tatarstannıñ urta hönäri häm yuğarı möselman uqu yortlarında köndezge bülektä belem aluçı 25 yäş’kä qadärge şäkertlär qatnaşa ala.

Tatarstanda tatarça wäğaz’ uquçılar arasında bäyge başlandı

Tatarstanda açıq televizion “Wäğaz’ bäygese iğ’lan itelde. Konkurs Tatarstan däwlät teleradiokompniyäse häm Tatarstan möselmannarı Diniyä näzaräte tarafınnan uzdırıla. Bäygeneñ maqsatı – tatar telendä osta wäğaz’çelärne açıqlaw häm xalıqqa tanıtu, ütemle itep söyläw ürnäklären kürsätü. Bu turıda Diniyä näzaräte xäbär itte. Bäygedä nindi hönär iyäse buluğa qaramastan 15 yäşe tulğan härkem qatnaşa ala. Konkursantlar yäş’ buyınça ayırım bäyälänäçäk:

15 yäş’tän 20 yäş’kä qadär;

21 yäş’tän 35 yäş’kä qadär;

36 yäş’tän ölkän qatnaşuçılar.

Wäğaz’ tatar telendä bulırğa, yattan söylänergä häm 7 minuttan artmasqa tiyeş. Bäyge 2 êtapta uzdırıla häm yomğaqlaw tantanası belän tögällänäçäk.