Üzäk Aziya cömhüriyätläreneñ kön tärtibendäge waqıyğalar
Awraziya qaytawazı 23/2023
Üzäk Aziya cömhüriyätlärendä bulıp uzğan möhim waqıyğalar
Uzğan atnada Üzäk Aziya törki cömhüriyätlärendä möhim täräqqıyätlär bulıp aldı. Bolarnıñ iñ möhim bulğanı - Üzbäkstan İlbaşı Şäwkät Mirziyayıvneñ Qırğızstanğa yasağan däwlät vizitın äytep uzarğa bula.
Üzbäkstan İlbaşı Şäwkät Mirziyayıv 2023nçe yılnıñ 26nçı-27nçe ğıynwar könnärendä Qırğızstanğa däwlät säfären yasadı. İlbaşı Mirziyayıvnı hawa mäydanında Qırğızstan Däwlät başlığı Sadır Caparov üze qarşı aldı. İke il Däwlät başlıqları 27nçe ğıynwar könne üzara häm wäkilleklärara söyläşülär uzdırdı. Söyläşülärdän soñ ike il arasında çik buylarınıñ bilgelänelüe häm küp yaqlı strategik xezmättäşlekne dä üz êçenä alğan cämğıse 25 kileşü imzalandı. Bu räweşle Tacikistannan qala başqa Üzäk Aziya cömhüriyätläre üz aralarında çik buyı problemaların zur külämdä xäl itkän buldı.
Üzbäkstan İlbaşı Şäwkät Mirziyayıv Qırğızstan säfäre aldınnan Törki däwlätlär oyışması ğomum särkätibe Kubanıçbäk Ömüraliyıvne qabul itkän ide. 24nçe ğıynwar könne Taşkentta ütkärelgän qabul itü waqıtında Törki däwlätlär oyışmasınıñ êşçänlege söyläşelde.
Başqa ber törki cömhüriyät oyışması bulğan Törki investiśiya fondı başlığı Bagdad Amreyıv uzğan atnada Vengriyağa säfär yasadı. Bagdad Amreyıv Budapeştta Vengriya (Macarstan) Baş ministrı Viktor Orban, Tışqı êşlär häm tışqı säwdä ministrı Peter Szijjarto, Baş ministr urınbasarı häm finans ministrı Mihaly Varga belän ayırım-ayırım söyläşülär ütkärde. Bagdad Amreyıvqa Baş ministr Orban “Vengriya däwlät xezmät ordenın tapşırdı.
24nçe ğıynwar könne Taşkentta İq’tisadi xezmättäşlek oyışması tışqı êşlär ministrlarınıñ 26nçı cıyılışı uzdı.
Cıyılışta oyışmağa äğ’za illärneñ tışqı êşlär ministrları qatnaştı. Şuşı uq könne İlbaşı Şäwkät Mirziyayıv cıyılış qısalarında Türkiyä, Azärbaycan, İran häm Törekmänstan tışqı êşlär ministrların ayırım-ayırım qabul itte.
18nçe ğıynwar könne Qazaqstan, 25nçe ğıynwar könne Üzbäkstan “Gazprom” belän tabiğıy gaz xezmättäşlege kileşüen imzaladı. Könbatış illärenä êksportı özelgän Rusiyä Könçığıştağı berlektäşläre belän xezmättäşlekkä östenlek birä.
23nçe ğıynwar könne Qazaqstan Parlament başlığı Maulen Aşimbayıv Qırğızstanğa räsmi säfär yasadı. Maulen Aşimbayıv Bişkäktä Qırğızstan Parlament başlığı Nurlanbäk Şakiyıv belän küreşte. İke il parlamentı başlıqları Çınğız Aytmatov forumında qatnaştı. 24nçe ğıynwar könne Qırğızstan İlbaşı Sadır Caparov Qazaqstan parlamentı başlığı Aşimbayıvne qabul itte.
24nçe ğıynwar könne Qazaqstan İlbaşı Qasıym Cumart Toqayıv Saha Cömhüriyäte başlığı Aysen Nikolayıv belän küreşte. Söyläşü waqıtında ike il mönäsäbätlären üsterü mömkinlekläre quzğatıldı.
21nçe ğıynwar könne Üzäk Aziyanıñ başqa ber ile bulğan Törekmänstanda parlamentnıñ ike palatası berläşterelde. Yaña barlıqqa kiterelgän Xalıq Mäsläxäte başlığı bulıp Gurbangulı Bärdimöxämmädov saylandı. Xalıq Mäsläxäte şuşı uq könne Gurbangulı Bärdimöxämmädovnı “Milli lider” itep iğlan itte. Gurbangulı Bärdimöxämmädov monnan soñ xalıqqa möräcäğät itä alaçaq häm partiya qorıltayında çığış yasıy alaçaq. Xalıq Mäsläxäte ayıruça İlbaşı Särdar Bärdimöxämmädovqa “Armiya generalı” däräcäsen täq’dim itte.
Waqıyğalardan kürengäne kebek, uzğan atnada Üzäk Aziya cömhüriyätlärendä törki cömhüriyätlär arasında xezmättäşlekne nığıtaçaq möhim alğarışlar buldı.
Abdrasul İsakov
