Borıñğı dön’yanıñ cide moğcizasınnan ikese Türkiyädä

Borıñğı dön’yanıñ cide moğcizasınnan ikeseneñ Türkiyädä buluın beläsezme?   

7 sanı antik çorda bilgele bulğan biş planeta, Qoyaş häm Aynıñ tuplamı bulğanlıqtan greklarda uñdırışlılıq häm kamillekne simvollaştıra. Äzerlängän isemleklärdä 7 sanı härwaqıt nigez itep alına. Bolardan berse bulğan Dön’yanıñ 7 moğcizası isemlege klassik borıñğı dön’yanıñ belengän täwge häm iñ iskitkeç misalı. İsemlektäge cide moğcizanıñ ikese, borıñğı zamannardan alıp bügengä qadär Urta diñgez tiräsendä dön’yanıñ iñ matur tabiği häm yasalma maturlıqların tuplap yasalğan Anadoluda urnaşqan.

Dön’ya moğcizaları arasındağı ike urınnıñ berse - Artemis ğıybadätxanäse. İzmirnıñ Sälçuk ilçäsendä häm antik Äfäs şähärennän yaqınça 4 çaqrım yıraqlıqta urnaşqan ğıybadätxänä bezneñ êrağa qadär 550 nçe yılda tözelgän dip uylanıla. Tulısınça märmärdän yasalğan häm yaqınça 120 yılda tözelgän Artemis ğıybadätxanäsennän bügenge köngä barı tik berniçä märmär kisäge genä qalğan.

Türkiyädäge tağın ber iske dön’ya moğcizası – Halikarnas mavzoleyı. Bügenge köndä populyar yal itü cirlege Bodrumda urnaşqan mavzoley bezneñ êrağa qadär 350 nçe yılda tözelä. Kariya patşası Mavsol öçen xatını häm qız tuğanı tarafınnan tözelgän unikal’ äsär zur cir teträwdä cimerelä. 15 nçe ğasırda täre poxodları waqıtında töbäkkä kilgän ğaskärlär Bodrum nığıtmasın tözegändä mavzoley kisäklären qullanalar. Şuña kürä Halikarnas mavzoleyınıñ xäräbäläre kübesençä yuqqa çığa häm bu mäydannı açıq hawa mäydanı itep kürergä mömkin. Häykälneñ qayber öleşläre Angliyädäge British muzeyında saqlana.