Vengriyä Urta Aziyägä yaqınaya

Vengriyä tışqı êşlär häm säwdä ministrı Peter Siyyarto 3-4nçe may könnärendä Urta Aziyä däwlätlärenä säfär yasadı. Ul barğan berençe il - Qazaqstan buldı. Siyyartonı Nur-Soltanda Qazaqstan ilbaşı Qasıym Cömärt Tokayev qarşıladı. Söyläşü barışında Tokayev Vengriyä belän xezmättäşlekneñ üsüenä zur ähämiyät birüen äytte. Ministr isä ileneñ Qazaqstan belän strategik partnyerlıqnı nığıtırğa teläwen citkerde.

Siyyarto Qazaqstan viśe-prem’yerı häm tışqı êşlär ministrı Muxtar Tiläubärdi belän dä oçraştı. Yaqlar ike ilneñ säwdä häm iq’tisadi xezmättäşlege turında fiker alıştı.

3nçe mayda Peter Siyyarto Qırğızstanğa bardı. Bişkäktä anı ilbaşı Sadır Caparov qabul itte. Ul ike aradağı mönäsäbätlär, strategik partnyerlıq häm duslıqnı köçäytügä kertkän öleşe öçen ministrğa Duslıq ordenı taqtı. Caparov Ukrainadan qırğız watandaşların êvakuaśiyäläwdä Siyyartonıñ nıq yärdäm itüen assızıqladı.

Vengriyä ministrı säfäre qısalarında Qırğızstan tışqı êşlär ministrı Cäänbäk Kulubayev, iq’tisad häm säwdä ministrı Daniyar Amangel’diyev belän oçraştı. Monnan tış, Bişkäktä Qırğızstan-Vengriyä strategik şurasınıñ ikençe cıyılışı tormışqa aşırıldı. Anda törle tarmaqlarda ike aradağı xezmättäşlek xaqında süz bardı.  

Vengriyä tışqı êşlär häm säwdä ministrı Peter Siyyarto soñınnan Bişkäktän Taşkentqa yul tottı. 4nçe mayda ul Üzbäkstan xökümäte räise urınbasarı, investiśiyä häm tışqı säwdä ministrı Särdar Umurzakov belän bergä  Üzbäkstan-Vengriyä xökümätlärarası komissiyäneñ cidençe utırışın citäkläde. Anda awıl xucalığı, farmaśevtika, ênergetika, azıq-tölek häm mäğarif tarmaqlarında xezmättäşlek turında süz bardı. Peter Siyyarto, monnan tış, tışqı êşlär ministrı wäkile Vladimir Norov belän dä oçraştı.

Rusiyä Ukrainağa höcüm itkändä Vengriyä Urta Aziyä xalqınıñ öylärenä qaytuına yärdäm itep qardäşlek wazıyfasın cirenä citkerde.

Siyyartonıñ Qırğızstanğa säfäre waqıtında Vengriyäneñ WizzAir şirkäteneñ Budapeşt-Bişkäk oçqıç säfärlären tizdän başlayacağı xäbär itelde.

Vengriyä xökümäte bıyıl 500dän artıq Urta Aziyä studentına üz yuğarı belem birü yortlarında uqu xoquqı tanıy. Anda stipendiyäle uquçılarnıñ sanı yıl sayın arta. Mäsälän, Vengriyä xökümäte tarafınnan Qırğızstanğa bülengän stipendiyä kvotası Siyyartonıñ soñğı säfärendä 150dän 200gä citkerelde.

Vengriyäneñ Urta Aziyä cömhüriyätläre belän mönäsäbätläre Törki däwlätlär oyışması kiñleklärendä dä üsä. Anıñ Türksoy, Xalıqara törki akademiyä, TürkPA şikelle xalıqara oyışmalar belän tağın da yaqın xezmättäşlek alıp baruı Urta Aziyä belän dä araların nığıtaçaq.

Kön üzägendä Vışegrad törkemeneñ Törki däwlätlär oyışması, Urta Aziyä cömhüriyätläre belän xezmättäşlekne üsterü bar.

İkeyaqlı bäyläneşlärneñ qorılmasınıñ 30 yıllığında Budapeştnıñ Urta Aziyä cömhüriyätläre belän mönäsäbätläre yaña däräcägä kütärelde. Viktor Orban citäkçelegendäge partiyäneñ qabat xakimiyätkä kilüe yaqın kiläçäktä Vengriyä - Urta Aziyä mönäsäbätläreneñ tağın da üsäçägen kürsätä.