Törkiyädä uram rizıqları

İstanbul bik küp cirle häm xalıqara restoran belän Törkiyäneñ ğastronomiya üzäge buluına qaramastan, uram rizıqları da bik läzzätle. Qabımlıq bulsın, tulısınça ber töşke yäisä kiçke aş bulsın – Törkiyä uramnarında tämle närsälär aşaw bik ciñel.

Här töbäkneñ üzeneñ populyar uram rizıqları bar. İñ kiñ taralğannarın Törkiyäneñ här cirendä tabarğa bula. Şuña kürä, waqıtığız tar bulsa yäisä Törkiyä şähärlärendä canlı uram tormışınıñ tämen tatırğa teläsägez, tuqtap läzzätle qabımlıq alığız.

Menä Törkiyädäge iñ populyar uram rizıqlarınnan qayberläreneñ isemlege.

Törkiyädä östenlek birelüçe täm-tomnarı arasında yaxşı tanış ürnäk – simit. Köncet belän qaplanğan bu keterdäp toruçı tügäräk kelinder üzeneñ iskitkeç täme belän bik küplärne ğaşıyq itterä. Üzen genä aşasañ da tuqlıqlı, yanında sır häm ber çınayaq çäy yäisä äyrän belän dä tämle bula. Aqça yançığı yäm vegan dustı buluı öçen dä östenlek birelä.

Qayberläre monı bäxäsle dip uylar, tik balıq belän ikmäk Törkiyädäge iñ kiñ taralğan uram rizıqlarınıñ berse buluı – çınbarlıq. Yaña peşkän ikmäkneñ arasında cılı qızdırılğan balıq, yäşellek häm suğan belän täq’dim itelüçe bu rizıqnıñ üzenä tartuçı ise yuldan uzuçılarnı tınıç qaldırmıy. Bäyäse arzan, tuqlıqlı häm läzzätle.

Sez bäräñgeneñ här törlesen yaratuçımı? Alaysa Törkiyä uramnarında satıluçı kumpirlar – peşkän bäräñgelärne tatıp qarağız. Sıyır mayı östägännän soñ törle souslar belän tämländerelgän kumpirnı bik oşataçaqsız. Sousnıñ telägänen saylarğa mömkin. Qazılıq, tozlı qıyar, zäytün, kukuruz.. Êçenä küpme teläsägez şulqadär tämländerüçe quydırtığız.

Çiratta - dönär. İt kisäkläre, cirle yäşelçälär häm tämlätkeçlär belän aldan äzerlänep quyıla, maxsus äylänep toruçı şäşkä tezelä häm vertikal’ räweştä qızdırıla. Başta dönär öçen sarıq ite genä qullanılğan, bügen böten Törkiyädä anı sıyır itennän dä, tawıqtan da äzerlilär.

Qışnıñ başlanuın xäbär itüçe iskitkeç uram läzzäte qawırılğan kaştannıqı şikelle başqa täm yuq. Qışqa kergändä Törkiyäneñ här töbägendä, här poçmaqta kaştan satuçı oçratırğa mömkin.

Baş tartıp bulmıy torğan tağın ber uram rizığı! Küp waqıtta qabımlıq bularaq täq’dim itelüçe tutırılğan midiyälärne yar buyı töbäklärendä yış oçrata alasız. Anı maxsus tördäge döge, turalğan suğan, waq yözem, toz, tämlätkeçlär häm limon belän äzerlilär.  

Kokoreç – tämlätkeçtä totılğan häm çıbıqqa tezelgän bärän êçäklekläre. Ul küp itep may salıp, tozlanıp yartı yäisä böten ikmäk belän täq’dim itelä.

Waqıtığız tar bulsa yäisä “alıp kit” törendäge rizıq êzläsägez, ber tälinkä tawıqlı pılaw şäp variant bula ala. Ul tradiśion törek aş-sularındağı ğadi döge pılawı östenä peşkän tawıq ite quyıp birelä. Bu tiñsez ikelegä peşerelgän noğıt ta östälä. Yanında ber stakan äyrän häm ber tälinki tozlı qıyar da yaxşı bulır.   

Tozlı yäşelçälär 15nçe ğasırda Ğosmanlı tabınnarında ähämiyätle urın ala başlağan. Ul ğoref-ğadätlär belän ürelep baruçı uram rizığı. Tozlanğan yäşelçälär waq itep turalıp suı belän bergä stakannarda satıla. Täme äçkeltem.

Bulgurnı suğan, sarımsaq häm törle tämlätkeçlär belän yoğırıp tämle rizıq äzerlänä. Çi kätlit yäisä bulgur kätlite. Anı üzen genä dä aşarğa bula, şulay uq, yäşelleklär häm lavaş ikmägenä dä törelep birelä. Çi kätlit yaratuçılar, başlıça, küp itep limon häm granat sousı östäp aşıy, yanında äyrän êçälär.

Yuqa qamır, bärän itennän farş häm tämlätkeçlär… Tantuni Märsinnän çığa, tik älege tämle qabımlıqnı Törkiyäneñ här cirendä oçratırğa mömkin. Bik küp keşe anıñ yanında tämlätkeçle êçemlek şalgam êçärgä häm tozlı qıyar aşarğa yarata.

Ğadi burger, sarımsaqlı tiñsez sous häm sıyır maylı tomat sousı… Yüeş gamburger, bigräk tä, tönge säğat’lärdä bik yaxşı uram läzzäte bula.

Parda peşerelgän kukuruz östenä toz, qara borıç häm başqa tämlätkeçlär sibelä häm, şulay itep, ul iskitkeç uram rizığına äwerelä.

Waqıtığız az bulsa häm ayağöste berär närsä qapqalarğa teläsägez, Törkiyäneñ här urınında törle qamır rizıqları – böräklär taba alasız.

Uram qabartması – teläsägez ğadi, teläsägez törle êçleklär belän här cirdä oçrıy torğan rizıq.  

Qäğaz’ xälwä – ballı, qaynatılğan söt belän tutırılğan keterdäp toruçı vaflidan tora.

Häm soñğısı bozlı mindal’. Bigräk tä ğadättän tış êsselärdä bik yaxşı kitüçe häm xäl kertüçe rizıqlarnıñ berse. Mindal’lärne peşerep suıtalar häm bozda täq’dim itälär.

Çığanaq:https://gogastronomyturkiye.com/ (Törkiyä mädäniyät häm turizm ministrlığı)