Törekmänstanda yaña ilbaşın sayladılar

12nçe mart könne Törekmänstanda xalıq yaña ilbaşı sayladı. Yaqınça 6 million 200 meñ keşe yäşägän ildä 3 million 460 meñ 80 terkälgän saylawçı bar. 9 namzät qatnaşqan saylawda tawış birü küläme 97,17% buldı. Törekmänstandağı saylawnı Bäysez däwlätlär cämğıyäte, Törki däwlätlär oyışması, Şanxay xezmättäşlek oyışması häm İslam xezmättäşlek oyışmasınıñ küzätüçe wäkillekläre küzätep bardı. Saylawğa küzätüçelär tübändäge bäyäne birde: “İlbaşı saylawı xalıqara standartlar häm cirle qanunnarğa yaraqlı bularaq uzdı”.

Törekmänstan Üzäk saylaw komissiyase 15nçe mart könne saylawnıñ tögäl näticäsen açıqladı. Kandidatlardan Törekmänstannıñ Kabinet şurası başlığı yärdämçese Särdar Bärdimöxämmädov tawışlarnıñ 72,97%ın cıyıp, ilneñ yaña däwlät başlığı buldı. Saylaw näticäsenä kürä 9 namzät arasınnan Törekmänstannıñ Däwlät Fizik tärbiyä häm sport institutı rektorı yärdämçese Xıdır Nunnayev 11,09% tawış belän ikençe, Marv gubernatorı yärdämçese Agadcan Bekmuradov isä 7,22% tawış belän öçençe buldı.

Törekmänstan ilbaşı saylawında ciñü yawlağan Särdar Bärdimöxämmädov 19nçı mart könne ant itep, wazıyfasına başladı. Törekmänstandağı Awıl xucalığı Universitetınıñ İnjenerlık-texnologiya fakul’tetın betergän Särdar Bärdimöxämmädov 2008-2011nçe yıllarda Rusiyä Federaŝiyase Tışqı êşlär ministrlığınıñ Diplomatiya Akademyasen tämamladı. Ayıruça 2011-2013nçe yıllar arasında Jenevada Awrupa iminlege mäs’äläsendä belem aldı. 2011-2019nçı yıllarda Törekmänstan tışqı êşlär ministrlığında törle wazıyfalar başqarğan Bärdimöxämmädov 2016-2018nçe yıllar arasında Törekmänstan Parlamentında xalıq ışanıçlısı buldı. 2019-2020nçe yıllarda cirle citäkçelektä vilayät’ başlığı yärdämçese häm gubernatorlık wazıyfaların başqarğan Särdar Bärdimöxämmädov soñınnan Törekmänstannıñ Sänägät’ häm tözeleş ministrı buldı. Bärdimöxämmädov ilbaşı bulıp saylanğançı Törekmänstannıñ Ministrlar şurası başlığı urınbasarı wazıyfasın başqara ide.

Särdar Bärdimöxämmädovnıñ tışqı häm êçke säyäsättä ätise, êlekke ilbaşı Gurbanguli Bärdimöxämmädovnıñ säyäsätlären däwam itterüe kötelä. Soñğı yıllarda Särdar Bärdimöxämmädov ätise urınına çit illärdä häm ildäge çaralar häm söyläşülärdä qatnaşa ide.

Gurbanguli Bärdimöxämmädov xaqimiyättän kitmäde. Törekmänstan belän 15 yıl citäklägän äti Bärdimöxämmädov Parlamentınıñ öske palatası bulğan Xalıq êşläre başlığı wazıyfasın başqarırğa däwam itäçäk.

İlbaşı Särdar Bärdimöxämmädov tışqı säyäsättä tarafsızlıq säyäsäten alıp baraçaq häm kürşe illär belän xezmättäşlekne nığıtuğa yünäläçäk. Bäysez däwlätlär cämğıyäte, İqtisadi xezmättäşlek oyışması, Şanxay xezmättäşlek oyışması häm İslam xezmättäşlek oyışmasına äğza däwlätlär Törekmänstan tışqı säyäsätendä östenlek birgän illär bulıp toralar.

Äfğanstandağı wazğıyät’ Törekmänstanğa turıdan täêsir itkäne öçen ilbaşı Bärdimöxämmädov äfğan citäkçelege belän yaqın mönäsäbätlärne däwam itteräçäk, Äfğanstanda tınıçlıq häm totrıqlılıqnıñ saqlanuı öçen tırışlıq quyaçaq. Törekmänstannıñ yaña ilbaşı Törki cömhüriyätlär belän ênergetika, transport ölkäläre belän ber rättän törle tarmaqlarda xezmättäşlekne tiränäytügä ähämiyät biräçäk. Çönki bu Törekmänstannıñ strategik xaläte öçen kiräk.