Urman çikläwegeneñ watanı - Törkiyä

Urman çikläwegeneñ watanı dip Törkiyäneñ ataluın belä idegezme?

Çığışı Qıtaydan bulsa da, funduknıñ watanı bularaq Törkiyäneñ Qara diñgez yarları kürsätelä. Antik çornıñ böyek tarixçısı Gerodot üzeneñ äsärendä urman çikläwegeneñ Qara diñgezneñ könçığışında citeşterelüen yaza. Ul üze yäşägän däwerdä älege çikläwekneñ mayınıñ niçek çığarıluın da añlata. Bu qadär borınğı yazmalarda iskä alınuı säbäple Törkiyädä Qara diñgez regionınıñ urman çikläwegeneñ watanı buluı häm anıñ dön’yağa monnan taraluı qabul itelä. Bügen dä funduk citeşterüdä Törkiyä dön’yada liderlardan.  

Plantaśiyälärdän awırlıq belän cıyıluçı urman çikläwegeneñ sälamätlek öçen faydası küp. Andağı magniy söyäklärne nığıta häm ul osteoporoznı kisätüçe ähämiyätle üsemleklärneñ berse. Monnan tış, älege çikläwek protein çığanağı da. Anı bigräk tä balalarğa sälamät üsü öçen kön sayın birergä kiñäş itälär. E vitaminına bay urman çikläwegeneñ yaman şeşne kisätüçe häm küzänäk yañartuçı üzençälekläre bar. Ul baş miye sälamätlege öçen dä faydalı. Çikläwekne kön sayın aşaw qan äyläneşen tärtipkä salıp immun sistemasın nığıta, yöräk häm qan tamırı awırularınnan saqlıy.