Yomırqa yabıqtıramı?

Konnektikut universitetı uzdırğan ber tikşerenü yomırqanıñ ozaq waqıt tuq totu mäs’äläsendä bik täêsirle buluın, ämma yabığu öçen anıñ belän tuqlanu häm diyeta programmalarınıñ 100% uñışqa kitermäwen kürsätte.

Millionnarça yıl tuqlanuıbızda ähämiyätle urın totqan yomırqa äle haman irtänge aşlarıbıznıñ alıştırğısız ber öleşe. Bu, şulay uq, anıñ êçendäge tuqlıqlı matdälär yärdämendä ozaq waqıt açıqmaw belän dä bäyle. Ğalimnär aqsımğa bay yomırqanıñ bu yağın törle yaqlap tikşerde.

Äytik, Konnektikut universitetı tikşerenüçeläreneñ ber täcribäsendä qatnaşuçılar ikegä bülenep ber ük külämdä kaloriyäle rizıqlar belän tuqlana. Tik ber törkem irtän yomırqa aşıy, ikençese isä könen qamır rizıqları belän başlıy. Yomırqa aşağan keşelärneñ açlıq xise tudıra torğan grelin gormonı däräcäse, ikençe törkemdägelär belän çağıştıranda, azraq bula häm irtänge aştan soñğı 24 säğat’ êçendä yaqınça 400 kilokaloriyğa kimräk qullanalar.

Yomırqa aşawnıñ ozaq waqıt tuq totuı mäs’äläsendä şöbhä yuq. Tik menä anı qullanunıñ yabığuğa täêsire isä tikşerenülärdä törle näticälär kürsätä.

Mäsälän, kiloların kimetü niyätennän tuqlanuçı keşelär belän uzğan täcribädä yomırqalı aqsımğa bay irtänge aş belän uglevodlı rizıqlar küp bulğanınıñ ozaq waqıtlı yoğıntısı qaraldı. 5 atnadan soñ kürengänçä, irtän yomırqa aşawçılarnıñ tän massası kürsätkeçläre 61%, bil äylänäse 34% häm yabığudağı uñışları 65%qa tağın da yaxşı näticälände.

Awırlığı artıq bulğan häm simez 50 keşedän toruçı törkem belän dä oxşaş täcribä ütkärelde. Anda irtän aşalğan yomırqanıñ, ozaq waqıt tuq totuına qaramastan, annan soñğı aşlarda tağın da azraq kaloriyäle rizıqlar aşaw telägen garantiyälämäwe kürengän. Tulayım alğanda, yomırqanıñ ozaq waqıt tuq totuda bik näticäle buluı, tik yabığuğa nigezlängän tuqlanu häm diyeta programmalarında 100% uñış kitermäwe açıqlandı.

Çığanaq: TÜBİTAK fänni-texnik jurnalı