TÜRKSOY häm Üzbäkstan
Awraziya qaytawazı 37
Bügenge yazmabızda Törki xalıqlar mӓdӓniyӓte xalıqara oyışması TÜRKSOYnıň Üzbӓkstan belӓn xezmӓttӓşlege xaqında süz alıp barabız.
Ağımdağı yılnıň 4 nçe sentyabrendӓ Törki xalıqlar mӓdӓniyӓte xalıqara oyışması TÜRKSOY belӓn Üzbӓkstan Cömhüriyӓte arasında mӓdӓni mönӓsӓbӓtlӓrne üz êçenӓ aluçı “TÜRKSOY – Üzbӓkstan kitabı” isemle ӓsӓrne tanıtu cıyılışı uzdı. Onlayn rejimda uzğan cıyılışta TÜRKSOY ğomum sӓrqӓtibe Düsen Kaseinov, Üzbӓkstan mӓdӓniyӓt ministrı Ozodbӓk Nazarbӓkov,Törkiyӓ ilbaşınıň baş kiňӓşçese Yalçın Topçu, tulı wӓqalӓtle ilçelӓr, xalıq ışanıçlıları hӓm diplomatlar qatnaştı. Cıyılışta Üzbӓkstan sӓnğӓt’çelӓreneň TÜRKSOY êşçӓnlegenӓ kertkӓn öleşlӓre hӓm ğomumӓn Üzbӓkstannıň ӓlege oyışma belӓn mönӓsӓbӓtlӓre söylӓşelde.
TÜRKSOY oyışqan könnӓn başlap mӓdӓniyӓt ölkӓsendӓ törki dönya belӓn bӓyle yözlӓgӓn çara ütkӓrde hӓm bu yünӓleştӓ êşçӓnlegen dӓwam itterӓ. Törki dönyanıň YUNESKOsı bulğan TÜRKSOY törki cömhüriyӓtlӓr arasındağı mӓdӓni mönӓsӓbӓtlӓrne üsterü belӓn bergӓ törki mӓdӓnӓyӓtne dönyağa da tanıta.
Üzbӓkstan Cömhüriyӓte 1993 nçe yılnıň 12 nçe iyülendӓ Almatı şӓhӓrendӓ TÜRKSOYnı nigezlӓw dokumentına qul quyğan oyışmağa ӓğ’za dӓwlӓtlӓrneň berse. Fӓqӓt’ Üzbӓkstannıň êlekke ilbaşı İslam Kӓrimov dӓwerendӓ kilep tuğan qayber konfliktlar arqasında TÜRKSOY ğomum sӓrqӓtiplegendӓ Üzbӓkstan wӓkile yuq.
2018 nçe yılnıň 3 nçe sentyabrendӓ uzğan 6 nçı Törki Şura sammitında çığış yasağan Üzbӓkstan ilbaşı Şӓwkӓt Mirziyayev YUNESKO Bötendönya mӓdӓniyat mirası isemlegendӓ urın alğan Xivӓ şӓhӓren Törki dönyanıň mӓdӓniyat başqalası itӓrgӓ tӓq’dim itte. Bu tӓq’dim Törki Şurağa ӓğ’za dӓwlӓtlӓrneň dӓwlӓt başlıqları tarafınnan qabul itelep 2020 nçe yılda Xivӓ şӓhӓre Törki dönyanıň mӓdӓniyat başqalası itep iğ’lan itelde. Üzbӓkstan mondıy möhim iniśiativa yasağannan soň ilneň mӓdӓniyӓt ministrlığı TÜRKSOY belӓn êşçӓnlegen köçӓytte.
Biredӓ şuňa basım yasarğa kirӓk: TÜRKSOY ğomum sӓrqӓtiplegendӓ Üzbӓkstan wӓkile bulmawğa qaramastan oyışma Üzbӓkstan sӓnğӓt’çelӓren, rӓssamnarın hӓm başqa bӓylӓneşle hönӓr iyӓlӓren daimi rӓweştӓ üz çaralarına çaqıra ide. TÜRKSOY ğomum üzӓgendӓ Alişir Nӓvoi, Abdullah Kadiri kebek üzbӓkstanlı olı şӓxeslӓrgӓ bağışlap konferenśiyӓlӓr oyıştırıldı.
2017 nçe yılda oyıştıruçılar arasında TÜRKSOY da bulğan Törki dönyada yılnıň ӓdӓbiyӓtçısı bülӓgenӓ üzbӓk yazuçısı Şükrulla layıq buldı. TÜRKSOY ğomum sӓrqӓtibe Düsen Kaseinov hӓrwaqıt ӓytep kilgӓnçӓ, Üzbӓkstan Cömhüriyӓte bayrağı ğomum sӓrqӓtiplektӓ hӓm TÜRKSOYnıň barlıq çaralarında cilferdi.
Üzbӓkstan Törki şurağa ӓğ’za bulğannan soň TÜRKSOY belӓn dӓ aktiv êşli başladı. Törki dönya üzbӓk mӓdӓniyӓten, sӓnğӓten, möhim şӓxeslӓren yaqınnan belergӓ tiyeş. Üzbӓkstan wӓkile TÜRKSOY ğomum sӓrqӓtiplegendӓ iň qısqa waqıtta êşkӓ kereşep bu tarmaqtağı êşçӓnleklӓrne tizlӓter dip ömetlӓnӓbez.
TÜRKSOYda bastırılğan xezmӓtlӓr oyışmağa ӓğ’za hӓm küzӓtüçe 14 il tellӓrenӓ tӓrcemӓ itelsӓ hӓm alar barısı da internetta dönya kürsӓ törki dönyanıň yaqınayuı tağın da tizlӓner, TÜRKSOYnıň êşçӓnleklӓre tağın da kübrӓk keşegӓ barıp ireşer ide.
