İdlib häm qotqarılğan töbäklärdä koronavirus belän köräş

Koronavirus dön’yada zur tizlek belän taralğanda Süriyä öçen borçılu ayırım urın alıp tora. Ozaq yıllar baruçı watandaşlar suğışı näticäsendä gumanitar krizis çoñğılına töşkän ildä kizü qotoçqıç näticälärgä kiterergä mömkin. Äsäd rejimı häm terrorçı oyışma PKK kontrolendäge töbäklär belän bergä İdlib häm başqa qotqarılğan cirleklär dä zur yanaw astında. Törkiyä anda yäşäwçelärgä niqadär bulışırğa tırışsa da, Bötendön’ya sälamätlek saqlaw oyışması häm xalıqara cämäğat’çelek virus belän köräşü öçen 5 millionnan artıq keşe yäşi torğan oppoziśiyä cirleklärenä yärdäm itärgä tiyeş.

Ozaq yıllar iñ awır suğış şartlarına duçar bulğan İdlib häm Törkiyä tarafınnan kontrol’ itelüçe Afrinnan Rasulaynğa qadär suzıluçı qotqarılğan töbäklärdä 5 million artıq grajdanlı yäşäw öçen tartışa. Alar daimi räweştä rejim häm terrorçı oyışma PKKnıñ höcümnärennän zarar kürä. Xäzer isä koronavirusnıñ yanawı da östälde.               

Törkiyä niqadär genä İdlib tışındağı oppoziśiyä cirleklärendä qulınnan kilgänçä sälamätlek saqlaw sistemasın tözekländersä dä, keşeneñ küplege häm suğış şartların isäpkä alğanda, äle xaman citdi qıyınlıqlar bar. İdlibtä isä wäzğıyät’ tağın da naçar. Töbäktä 3 millionnan artıq keşe yäşi. Cirlek - 2019nçı yılnıñ avgustınnan birle rejim, Rusiyä häm İrannıñ nişanı astında. Töbäkkä qarata oyıştırılğan xärbi xäräkätlär kimendä 1 million yarım keşene yäşägän cirennän kitärgä mäcbür itte. Alarnıñ 1 millionı Törkiyä-İdlib çik buyındağı lager’larda bik awır şartlarda yäşäw öçen köräşä. Tağın 300 meñ idlibli başqa qotqarılğan cirleklärdä möhacir xälendä.

Xäräkätlär waqıtında töbäktäge sälamätlek asqorması – xastaxanä häm sırxawxanälär – rejim belän yärdämçeläreneñ nişanı astında. Cirlektäge 300 mediśina ob’yektınıñ kimendä yartısı älege höcümnärdä yuq itelde.

 Axır çiktä, sälamätlek saqlaw asqormasınıñ zur külämdä cimerelüe, xalıqnıñ küplege häm möhacir lager’larındağı şartlar näticäsendä sośial’ distanśiyä qağıydäsen tormışqa aşıru mömkinlege bulmaw İdlibne koronavirus qarşında köçsez xälgä kiterä. Şuña kürä xalıqara cämäğat’çelek buldıra alğan qadär İdlib häm başqa oppoziśiyä töbäklärenä yärdäm itärgä tiyeş. Yuqsa yöz meñlägän keşeneñ ğomere özelergä mömkin.

Can Acun

Säyäsi, iq’tisadi häm ictimağıy tikşerenülär waqıfı SETAnıñ tışqı säyäsät tikşerenüçese