Nogayça 107: Ana ata haqqı (4)

Bu yuma tagı em “ANA ATA HAQQI” baresinde habarlasamız!

Nogayça 107: Ana ata haqqı (4)

Nogayça 107: Ana ata haqqı (4)

Ana ata baresinde 

Aytılgan manelerdiñ 

Qalganını tagı em

Bügün aytıyaq inşallah...

 

“Endi yañı bîr mane, 

Ana ata süygüsü,   

Allah üşün bolsa kerek...

Nege desek onlardı, 

Bizge ana ata qılgan 

Rab Allah’tıñ özi bolgan.

Ana ata yüregine,   

Ayav, maramattı taslap;

Bizdi onlar qolıman 

Yahşı kepte tarbiyalap  

Sosınlardı bizlerge,  

Alal qızmat ettirgen, 

Rabbımız Allah bolgan...

 

So sebepten bizler tagı, 

Hikmet em rahmetpen  

Sosınlarga salıngan

Ayav em maramatpan    

Kelgen nimetti körüp    

Ana atadı süysek;

Bu süygü Allah’tı   

Süygen ornına ötken...

 

Onlardı Allah üşün        

Süygendiñ işareti,   

Onlar qartaygan vaqıt, 

Äş ıncıtpay qızmat etsek...

Atta bizdi maşaqqatqa 

Atqan zamanda onlar,  

Bizge bîr paydaları,  

Qalmaganları vaqıt, 

Sosınlardı taga köp   

Süysek em örmet etsek...

 

Ene sosı süygümüz,   

Allah üşün bolganga    

Özi de ibadet bolgan...

Onlar qartaygansaytın 

Örmet em maramatımız ,

Ketkensaytın artıyaq...

 

Är dayim sosınlardı,  

Yahşı, ullı tabiyatpan, 

Tagı martşe gayratpan

Ömirleriniñ tagı,  

Sozılganın em tilesek...

Onlar betinden savap  

Qazangandı oylap

Tagı alal örmetpen  

Qollarını öpkenden 

Üşün tedim alsak kerek...

 

Yoqsa biz onlardı,  

Özimiz üşün süysek,   

Qartlıqqa bargan yasqa,

Bizge yük bolıyaq alge 

Kirgenleri vaqıt, 

Eñ tömen bîr duyguman

Onlardı avır körüp      

Ölgenlerin tilesek,

Sosı vahşi, muñun aldiñ,      

Soñı aşşı bolıyaq...

 

Onlardıñ bizge aqqı,

Quran qaravışıman 

Ne derece mühim eken;

Em de onlarga isyan,  

Ne derece küna eken, 

Bîr taga oylasaq kerek...

 

Ey insan endi sen,     

Esindi basına al! 

Eger sen ölmesen     

Özin tagı qart bolasın...

Ceza özi cinsinden    

Kelip etkendi tabar.

Qanunı em sırrıman   

Sen ana atana,    

Eger örmet etpesen,

Seniñ balan tagı saga,  

İnan qızmat etpiyek!

 

Eger öte dünyañdı     

Sen süyetegan bolsan,

Ene saga bîr qazna...    

Onlarga sen qızmat et!

Eger dünyadı süysen 

Kene onlardı razı et! 

Ana atandan sebep,

Yaşavın ötsin rahat;   

Rızqın tolsun bereket...

 

Sosınlardı avır körsen, 

Onlardıñ köp nazik 

Tez incıngan yüreklerin

Küydürüp tursan eger, 

Em dünyada em ahirette,

Ziyanga ugrasan kerek...

 

Eger Kuday rahmetini,  

Tilegen bolsan sen, 

So Rahman’dıñ amanatı

Anaña em ataña,       

Tagı sen, maramat et!

 

Ahiret kardaşlarımdan     

Yahşı bîr zat bar edi. 

Dininde em dünyasında,    

Onı aldın körer edim.

Tek, aldıda bolganın  

Sırrını bilmes edim.

Soñında  añlaganım,    

Ene sosı dosumdıñ

Dininde em dünyasında, 

Yahşılıqqa barganı,   

Qart ana atasınıñ

Haqlarını añlayberip,  

Sosınlardıñ huquqına, 

Tap uyup turgan eken..

So sebepten bîr rahat    

Em rahmet tapqan eken!

İnşallah so alimen 

Ahiretini tamirlep      

Abedi bina etken...

Baqtiyar bolgan adem,      

Oga oqşasa kerek...”

 

Sözdiñ soñını ‘Yennet,      

Analardıñ ayagı     

Astında bolganını,

Bizge aytqan Paygambar’ga,       

Salat selam yiberip,

Em şefaatını tilep     

Sözdi bitirsek kerek...       

 

Savlıqpan qalıñız!

 

Dr. Yusuf ALTINIŞIK

E-mail: altinisikyusuf@gmail.com



Bäyläneşle xäbärlär