Nogayça 74: Parız aci’deki bazı hikmetler

Allah’tıñ bizge yazgan     

Bes parzından bîrevi,

Mübarek yer Mekke’deki, 

Käbe’di tavaf bolgan.

Tagı Arafat’qa barıp 

Mü’minlerdiñ barabarca  

Etken duaları bolgan...

Sosı parız ibadetke         

Aci dep at berilgen...

Em Medine’ge barıp       

Paygambar’dı (as) ziyaret,

Oga süygümizdi tagı       

Körsetkeni savap bolgan...

Allah’tıñ emirleri,     

Miñler hikmetpinen tolgan...

Aci degen parızdıñ 

Neşe hikmetlerinden

Bîr kesegi nav bolgan:

Är kim sosı mübarek  

Orınlarga baralsa,   

Köp şerepli ibadet

Bolgan sosı Aci’men  

Ullı maqamlarga yetken...

Aci’diñ qıymatına 

Misal bolsa; bîr asker,

Padşadıñ has küninde,

Bayram etken bîr küninde,  

Qumandanlar işinde,

Sosınlarga qosulıp      

Padşadıñ är kimge

Etken iygiligine,         

Sosı asker de yetken...

Aynı sonday bîr aci de      

Halqtan bîrev bolsa da;

Martebeler ötip ketken      

Abıraylı bîr validey,

Barı tögerek dünyadıñ    

Ullı Rabb’ı huzurına,

Yaratuvşı Kuday’ına          

Bargan, soga yöneygen...

Bîr basına tuvıl em 

Mü’minlermen barabar,

Sosınlarga qosılganga;

Müminlerden iymanına    

Baresinden quvvat algan...

Özi yalgız bolmaganga,    

Yamagat qullıgından,

Barabarca şerep algan...

So ibadet müminge,     

Em ullı bîr aşkış bolıp...

Közine em köñline     

Neşe maneler aşqan:

Aldın sonıñ qalbine,   

Rabb’ımızdıñ neşe ullı,  

Azamatı körilgen...

Nege desek milyonlardıñ,   

Baresiniñ barabarca

Haq’qa yalbarganın körgen...

Ziyadası so ibadet,   

Ereklerdi köstergen

Dürbün bolup mü’minge,

Yaratuvşı Hak Rab’tıñ   

Allah bolgan martebede,

Soñsız tecellisini,   

Añlamaga yol aşqan...

Basqa sözben aytılsa,  

Allah azamatına,   

Aci’deki milyonşa

İnsanlardıñ qullıgından    

İsse alıp so mümin,

Kaydey üyken bîr Rab’qa    

Qullıq etkenin bilgen...

Aci’deki nişanlarman  

Yani Käbe, Arapat’pan,

Müzdelipe, Sapa Merve,

Tagı Şaytan taslav’dan,  

Qalbine em hayaline,

Ketkensaytın kengeygen

Qullıqtan, neşe şeşit   

Dayireler aşılgan...

Sosınlarman taga da   

Allah’tıñ azamatı,   

Qatın qatın bilinip

Sosı mü’min köñlinde,     

Rabb’ına biraz taga

Yuvıq bolganı üşün,   

Barı işinde tuvgan   

İssilikpen hararet;

Esine kelgen hayret;   

Yüregini biylegen      

Sosı Rab’taqı heybet;

“Allah üyken! Allah üyken!     

Är zattan taga üyken!”

Manalarına kelgen  

“Allahü Ekber”sözimen  

Mü’min köñli yatısqan!

Tagı basqa allermen    

Aşılgan so martebeler,

Sosı sözben alemge,   

Bildirilgen, aytılgan...

Ene sosı hikmetpen       

“Allahü Ekber” degen söz,

Aci’de, em namazlarda,    

Qayta qayta aytılgan...

Savlıqpan qalıñız!

Dr. Yusuf ALTINIŞIK

E-mail: altinisikyusuf@gmail.com