Awraziya kiñlegendä 12

Ukraina däwlät başlığı Petro Poroşenko 9-10 nçı mart könnärendä Törkiyä – Ukraina yuğarı däräcäle strategik şurasınıñ 5 nçe cıyılışında qatnaşu qısasında Törkiyägä 2 könlek räsmi säfär yasadı. Qunaq öçen ilbaşı kölliyätendä räsmi qarşı alu tantanası oyıştırıldı.

Qarşı alu tantanasında Törkiyä premyer-ministr urınbasarı Yalçın Akdoğan, tışqı eşlär ministrı Mävlüt Çavuşoğlu,milli saqlanu ministrı İsmät Yılmaz, energetika häm tabiği çığanaqlar ministrı Bärat Albayraq,moxitne saqlaw häm şähär tözeleşe ministrı Fatma Güldämät Sarı,ğomum ştab başlığı armiya generalı Hulusi Akar,ilbaşı idaräse ğomum särqätibe Fahri Kasırga,ilbaşı idaräse süzçese İbrahim Kalın häm Änkara vilayät başlığı Mäxmät Kılıçlar qatnaştı. Ukraina wäkillegendä isä Qırım tatarları liderı Abdülcämil Qırımoğlu belän Ukraina räsmi zatları urın aldı.

Qarşı alu tantanasınnan soñ Ärdoğan häm Poroşenko üzara küreşep söyläşte. Söyläşüdä ike il mönäsäbätläre, regional häm xalıqara mäs'älälär belän berrättän Rusiyäneñ Qırımnı yawlap aluı häm Qırım tatarlarınıñ soñğı wäzğiyäte xaqında süz bardı.

Üzara söyläşüdän soñ Törkiyä – Ukraina yuğarı däräcäle strategik şura utırışı uzdı. Ukraina belän strategik partnerlıq mönäsäbätlären üsterügä yünälgän xezmättäşlek mömkinlekläre qaralğan utırıştan soñ ike il räsmi zatları iminlek, media tarmaqlarında xezmättäşlek kileşüärenä qul quydı.

Törkiyä milli iminlek şurası ğomum särqätibe Säyfullah Hacımüftüoğlu belän Ukraina iminlek häm saqlanu şurası ğomum särqätibe Aleksandr Turçinov imzalağan iminlek xezmättäşlek kileşüe ayıruça Qara diñgez töbägendä xezmättäşlekne arttırunı maqsat itep quya. İke ğomum särqätip ağımdağı yılnıñ 22 nçe ğinwarında oçraşıp älege kileşüneñ neçkälekläre xaqında söyläşkän ide.

Cıyılışta “Anadolu” agentlığı belän “Ukrinform”agentlığı arasında da kileşü imzalandı. Monnan soñ Törkiyä belän Ukraina qayber mäs'älälärdä media xezmättäşlegen arttıraçaq. Kileşülärgä qul quyu tantanasınnan soñ Ärdoğan häm Poroşenko urtaq matbuğat oçraşuı ütkärde.

Matbuğat oçraşuında çığış yasawçı Törkiyä ilbaşı Räcäp Tayyip Ärdoğan Ukrainada Poroşenko citäkçelegendä alıp barılğan kiñ qırlı reforma häm iqtisadi yañaru barışına zur ähämiyät birülären belderde. Bu qısada uzğan yıl süz birgän 50 million dollar külämendäge taşlamalı kredit kileşüen uzğan ay Kiyevtä imzalanuın belderüçe Ärdoğan,10 million dollar humanitar yärdäm eşçanleklären dä tögälläp Ukrainağa här tarmaqta yaqlaw kürsätüneñ däwam itäçägen belderde. İlbaşı Poroşenko isä ilenä kürsätelgän yärdämnär uñayınnan Törkiyägä räxmätlären citkerde.

Ukraina ilbaşı Petro Poroşenko Törkiyä säfäre qısasında Törkiyä Böyek Millät Mäclese başlığı İsmail Kahraman belän küreşep söyläşte. Poroşenko Törkiyä Böyek Millät Mäcleseneñ 1944 nçe yılğı Qırım genotsidın tanuın soradı.

Ukraina ilbaşı Petro Poroşenko Çankaya sarayında premyer - ministr Äxmät Dawıtoğlu belän oçraşıp söyläşte. İke lider ağımdağı yılnıñ 15 nçe fevralendä Kiyevtä oçraşqan ide.

Poroşenko 2 könlek räsmi Änkara säfäre qısasında Törkiyädä yäşäwçe ukrainalılar häm Qırım tatar cämğiyätläre wäkilläre belän dä oçraştı. Ukraina däwlät başlığı “TRT WORLD”kanalına intervyu birde. Poroşenko intervyusında “Törkiyä belän Ukraina mönäsäbätläre berqayçan da bu däräcädä bulmadı. Törkiyä bezneñ strategik partnerıbız”dide.

Törkiyä – Ukraina mönäsäbätläre Poroşenko beldergänçä soñğı yıllarda iñ yuğarı däräcägä citte. Qara diñgez,Qırım, Rusiya krizisi,mäsxät törekläre kebek bik küp mäs'älä ike ilne ber-bersenä yaqınayttı. Ukrainanıñ könçığışındağı waqiğalar tä'sir itkän mäsxät törekläre etaplı bularaq Törkiyägä küçerelä. Törkiyä Qırım tatarlarınıñ urnaşuı mäs'äläsendä dä Ukrainağa yärdäm itäçägen belderde. İke il xezmättäşlege xärbi tarmaqta da iñ yuğarı däräcägä citte. Tuplam qimmäte yaqınça 810 meñ dollar bulğan xärbi cihaz ,5 qır xastaxanäse bu bäyläneştä Törkiyädän Ukrainağa soñğı däwerdä cibärelgän yärdämnär arasında urın ala. Ukraina Törkiyä cähätennän bik küp mäs'älädä Rusiyäneñ urının alu potentsialına iyä.Bu bäyläneştä dä ike il mönäsäbätlären tağın da üsterü zarur.