Nogayşa 196: Allah üşün süyülse, ahirette aqıbatı ne bolgan? (3)
Süygü, Allah üşün bolsa,
Ahiretteki paydaları,
Aqıbatı ne bolgan?
So barede bîr alimdiñ
Aytqanı ‘Toguz İşaret’ten
Qalganlar nalar bolgan:
“Üşünşi İşaret:
Yaşav yoldasın bikenge
Halal tögerek işinde;
Yani gözel şepqatine,
İşindeki maramatqa,
Em gözel qasiyetine,
Tagı yahşı tabiyatına,
Baylangan bîr süygüdiñ;
Em yaman allerden,
Künalerden saqlagandıñ
Ahiret’teki aqıbatı,
Nav yahşı al bolgan:
Soñsız Rahim Allah onı,
Sosı yaşav yoldasındı,
Hurilerden köp yahşı
Suvret em ziynetpen,
Özine taga tartuvşı
Bîr alminen yaratıp,
So tatimlik yurtında,
Ol abedi hayatta,
Saga yoldas beriyek!
Burungıda dünyadaqı
Basınızdan ötken zatlardı,
Bîr bîrevinizge, tatli tatli,
Nazzet em zavqpınan
Aytıyagınız bîr yoldas,
Em neşe hatirelerdi,
Eslerge akeliyek
Yahşı bîr yan yoldası,
Taga süyümli süygüli,
Bîr gözel dayim arqadaş,
Etip saga beriyek...
Ene süytüp etiyegine
Allah özi söz bergen...
Elbet Qudaysöz berse
Sözinden qaytuv bolmas!
Törtünşi İşaret:
Ana, ata, avletke,
Halal bolgan muhabbettiñ
Aqıbatı Qur’an’dıñ
Ayetimen aytılgan kep,
Är bîreviniñ maqamları,
Ayrı ayrı bolsa tagı,
Gene sosı tatimli
Ayaldi, taza kepte
Habarlasuv nazzetimen,
So Yannet’ke tiyisli
Bîr yaşav kebimen,
Soñsız bîr hayatta,
Barabarşa yaşatıp
Özlerine nav suvretpen,
İhsan, iqram etiyek...
Em onbes yasqa kirmeden,
Akil balig bolmadan
Ölgen balları bolsa,
‘Vildanün muxalledün’
Degen Qur’an sözimen,
Quday sosı ballardı,
Yannet balları etip,
Em Yannet’ke tiyisli,
Gayet süslü, süyümli
Bîr keppimen sonlardı,
Ata em anasınıñ
Qucagına beriyek...
Tagı ana, atalardıñ
Yüreklerin biylegen
Balalarga süygüdi,
Yannet’te qayta berip
Özlerini süyündiriyek...
Balaga süygü zavqını
Tagı em nazzatini,
Quday’ımız Hak Rabb’ımız,
Dayim etip beriyek...
Nege desen so ballar,
Akil balig bolmastan
On bes yastan avvel,
Mükellep bolmay ölgenge
Dayim tetli, süyümli,
Bala bolup qalıyaqlar...
Dünyadaqı nazzetli,
Är bîr zattıñ en biyigi,
Yannet’te tabılganga
Tek, köp tetli bîr nimet,
Ana atalıq zavqı,
Yani balasın süyüp
Sıypagandıñ nazzeti,
Yannet köbeyüv yeri
Bolmaganı sebep,
-Yannet’te bala süygüsi,
Yok dep biliner edi-.
Demek aqıyqat üşün al,
Mine nav aytılgan
Suvrette bîr almen
Yani bala süygüsi,
Dünyadan taga yahşı,
Taga zavqlı, em tatli,
Em ullı kebimen,
Ana ataga beriliyek...
Endi nav orında,
Balları akil balig
Bolmay ölgen analarga,
Em atalarga nav aqıyqat,
Üyken bîr müjde bolgan...”
Qalgan basqa işaretlerdi,
Aldımızdaqı yumada
Allah bizge nasip qılsa,
Bîr üyken rahmet boladı...
Savlıqpan qalıñız!
Dr. Yusuf ALTINIŞIK
E-mail: altinisikyusuf@gmail.com
