İrlandiya futbol klubınıñ logotibı - Ğosmanlı bayrağınnan

İrlandiyäneñ "Droêda Yunayted" dip ataluçı futbol klubınıñ logotibı  ilneñ başqa klublarınıñ simvollarınnan ayırılıp tora. Anda yarımay belän yoldız bar. Klubnıñ gerbı törek imperatorlığına xörmät maqsatınnan Ğosmanlı bayrağınnan ilham alıp yasalğan. Keçkenä genä ber İrlandiyä şähärçegendä qorılğan futbol klubı belän 3000 çaqrım yıraqlıqtağı imperatorlıqnıñ ber-berse belän nindi bäyläneşe bulırğa mömkin? Monıñ säbäbe närsädä?

Gerbnıñ xikäyäse "İrlandiya bäräñge qıtlığı" dip ataluçı faciğadan başlana. Zur qıtlıq dip tä ataluçı bu faciğa 1845nçe yılda bäräñge üsentelärenä yoqqan çirneñ utrawdağı barlıq igenne yuq itüennän soñ barlıqqa kilä. Üsemleklärne basıp alğan awıru Böyekbritaniya tarafınnan koloniyä bularaq idarä itelgän çorda il xalqına hälakät şikelle täêsir itä. İrlandiyada yäşäwçelärneñ yartısınnan kübräge ul çaqta bäräñge belän tuqlana häm ingliz mandatı astında yäşäwçe bolay da yarlı bulğan xalıqnıñ başqa azıq-tölekkä ireşü mömkinlege bulmıy. Moña qaramastan, Böyekbritaniya İrlandiyadan üz territoriyäsenä mal-tuar aluın däwam itä. Näticädä moxtaclıqtağı millionlağan keşe bäräñge uñışı alğan 1852nçe yılğa qadär açlıqta yäşi. Yaqınça 1 millionı açlıqtan ülä häm şul qadärese ük tirän yarlılıq säbäple ildän kitärgä mäcbür bula.

İnglizlär tarafınnan tağın da naçar xälgä kiterelgän bu çorda İrlandiya xalqına yärdäm itkän az sanlı däwlätlärneñ berse Ğosmanlı bula. Soltan Abdülmäcit utrawğa xäzerge aqça belän 110 meñ dollarğa turı kilüçe 1 meñ funt-sterling finans yärdäm cibärä. Monnan tış, aşlıq häm törle azıq-tölek taşuçı Ğosmanlı korabları İrlandiya yarlarına tuqtala. İstanbuldan quzğalğan korablarnıñ ul çaqtağı Dublin portına kerülärenä röxsät birelmi. Ğosmanlı diñgezçeläre yärdämne Droêda portına yäşeren räweştä buşata.

Bu qıtlıqtan soñ 70 yıl uzğaç älege keçkenä şähärçektä tözelgän futbol klubı "Droêda Yunayted" üzlärenä suzılğan bu yärdäm qulın onıtmıy häm ul waqıttan birle Ğosmanlı imperatorlığına xörmätlären kürsätü öçen Ğosmanlı bayrağınıñ simvolların qullana.