Brüs Uillisnıñ xäle naçar
Tanılğan aktyernıñ ğailäse sośial’ mediada belderü yasadı
Gollivudnıñ tanılğan aktyerı Brüs Uillisnıñ xäle naçarayğannan naçaray. Anıñ ğailäse sośial’ mediada belderü yasadı. Tuğannarı 67 yäş’lek aktyernıñ söyläşü funkśiyäläreneñ yuqqa çığa baruın, aña mañğay-çigä deminśiyäse diagnozı quyıluın citkerde. Çir Brüs Uillisnıñ aralaşu mömkinleklären ähämiyätle däräcädä ciklägän.
Belderüdä mondıy yullar bar: “Bügen bu xastalıqtan däwa yuq. Kiläçäk yıllarda monıñ üzgärä aluına ömetlänäbez. Brüsnıñ xäle naçarayğan sayın medianıñ iğ’tibarın tağın da kübräk añlayış häm tikşerenü sorawçı bu çirne yaqtırtuğa birüen kötäbez”.
Tanılğan aktyernıñ xastalığı arqasında 2022nçe yılnıñ martında kinemotografiyädän kitüe belderelde.
Uillis kar’yerasın 1970nçe yıllarnıñ başında Brodveyda säxnälärgä çığıp başlıy. Yartı ğasır êçendä ul distälärçä mäşhür fil’mda töp rol’lärdä uynıy.
Brüs Uillis qatnaşındağı axırğı fil’m “Assassin” 31nçe martta êkrannarğa çığaçaq.
