Türkiyä 2028nçe häm 2032nçe yıl öçen kandidat

Türkiyä 2028nçe häm 2032nçe yılğı Awrupa futbol çempionatın üzendä uzdıru öçen möräcäğat’ itte. Bu turıda Türkiyä futbol federaśiyäse räise Mäxmät Büyükäkşi belderü yasadı.

“2028nçe yıl öçen İrlandiyä, Şotlandiyä, Uêl’s häm Angliyä urtaq kandidatlıq ğarizası birde. Bez yalğız möräcäğat’ ittek. 2032nçe yıl öçen isä İtaliyä berüze ğariza tapşırdı, bez dä ütkärü öçen teläk belderdek. Bezneñ dön’ya külämendä bik ähämiyätle stadionnarıbız bar. Şähärlärebezne sayladıq, äzerlek yasap UEFAğa belderdek. Başqa illär möräcäğat’ itä almas monnan soñ, waqıt bette. Türkiyä ikesendä dä kandidaturasın täq’dim itte,”-dip söyläde Mäxmät Büyükäkşi.

Türkiyä futbol federaśiyäse räise şähär saylawda UEFAnıñ kriteriyları barlığın äytte. “Bez şähärlärne üzebezneñ teläkkä qarap saylamıybız. Stadion sıydırışlılığı bar. Şähärlär arasındağı yıraqlıqqa qarıylar,”-dip añlata ul. Wäqalätle zat 2028nçe yäisä 2032nçe yılğı çempionatlardan bersen uzdıru mömkinlegen qazanaçaqlarına ışana.