3300 yıllıq möher häm xäncär tabıldı

Törkiyäneñ Kütaxiyä töbägendä 8 meñ yıllıq tarixqa iyä Tavşanlı kurganında yaña çor qazınu êşçänlekläre barışında borıñğı möher belän xäncär tabıldı. Alarğa 3300 yıl buluı açıqlandı.

Hawadan töşerelgän videolarda yöräk räweşendä kürenüe öçen kurganğa “Kütaxiyäneñ qalebe” iseme birelä. Andağı arxeologik êşçänlek “İlbaşı qararı nigezendäge qazınular” statusında alıp barıla.

Yaña çor qazınular uzğan ayda Biläcik Şäyex Ädäbali universitetınıñ arxeologiyä bülege belgeçe, dośent Ärkan Fidan citäkçelegendä başlandı. Anda 3300 yıllıq unikal’ möher häm Miken qılıçların xäterlätüçe xäncär tabıla. Tarixi äsärlärne mädäniyät häm turizm ministrlığı sośial’ media aşa urtaqlaştı.