Rus wäqalätlelären Xalıqara Olimpiya komitetınnan quarğa telilär

Şveyśariyä xökümäte Xalıqara Olimpiya komitetında yuğarı urınnar biläwçe Rusiyä häm Belarus’ wäqalätlelären quarğa çaqırdı.

İlneñ xäbär agentlığı SDAnıñ xäbärenä qarağanda, Şveyśariyä sport ministrı Viola Amxerd komitetqa bu xaqta xat cibärä. Ul Ukrainağa höcümnär säbäple Rusiyä häm Belarus’ sportçılarınıñ olimpiadalardan çitläşterelüeneñ citärlek bulmawın äytä. Amxerd bu çikläwlärgä älege illärneñ Xalıqara Olimpiya komitetında yuğarı wazıyfa başqaruçı räsmiläre dä kertelergä tiyeşlegen belderä.

Şveyśariyä Olimpiya komitetı da älege wäqalätlelärneñ kübeseneñ Mäskäw idaräse belän yaqın mönäsäbätläre barlığın citkerä häm xökümätneñ taläben yaqlıy.

İsegezgä töşeräbez, Rusiyä-Ukraina suğışı başlanğannan soñ 28nçe fevral’dä Xalıqara Olimpiya komitetı yazmaça belderü yasadı häm Rusiyä atletlarınıñ monnan soñğı çaralarda qatnaşuın tıyarğa kiñäş itte.

Xalıqara futbol federaśiyäläre berlege häm Awrupa futbol federaśiyäläre berlege barlıq Rusiyä klubları häm cıyılma komandasın başqa qararğa qadär turnirlardan çitläşterde.